Skip to main content
x
ቦምብ በማቀበልና በመወርወር በተጠረጠሩ ላይ ዓቃቤ ሕግ ክስ መሥርቶ እንዲቀርብ ትዕዛዝ ተሰጠው
ሰኔ 16 ቀን 2010 ዓ.ም. ለጠቅላይ ሚኒስትር ዓብይ አህመድ (ዶ/ር) በተደረገው የድጋፍና የምሥጋና ሠልፍ

ቦምብ በማቀበልና በመወርወር በተጠረጠሩ ላይ ዓቃቤ ሕግ ክስ መሥርቶ እንዲቀርብ ትዕዛዝ ተሰጠው

ለጠቅላይ ሚኒስትር ዓብይ አህመድ (ዶ/ር) ድጋፍና ምሥጋና ለመስጠት በመስቀል አደባባይ ሠልፍ በወጡ በርካታ ሰዎች ላይ የተወረወረውን ቦምብ በማቀበልና በመወርወር በተጠረጠሩ ሁለት ግለሰቦች ላይ፣ ክስ መሥርቶ እንዲቀርብ ዓቃቤ ሕግ ትዕዛዝ ተሰጠው፡፡

የፌዴራል ፖሊስ ወንጀል ምርመራ ቡድን ሰኞ ጳጉሜን 5 ቀን 2010 ዓ.ም. ለፌዴራል የመጀመርያ ደረጃ ፍርድ ቤት አንደኛ ተረኛ ወንጀል ችሎት እንዳስረዳው፣ በሁለቱ ተጠርጣሪዎች ማለትም ቦምብ በማቀበል የተጠረጠረው አቶ ብርሃኑ ጃፋርና ቦምቡን በመወርወር የተጠረጠረው አቶ ጥላሁን ጌታቸው ላይ ሲያካሂድ የነበረውን ምርመራ አጠናቆ ለዓቃቤ ሕግ አስረክቧል፡፡

መርማሪ ቡድኑ የምርመራ መዝገቡን ለዓቃቤ ሕግ ሲያስረክብ ለሁለተኛ ጊዜ ነው፣ ቀደም ብሎ ምርመራውን ማጠናቀቁን ለፍርድ ቤት በመንገር ለዓቃቤ ሕግ ቢያስረክብም፣ የሚቀረው ምርመራ እንዳለ የወንጀለኛ መቅጫ ሥነ ሥርዓት ሕግ ቁጥር 38(ሐ) ጠቅሶ እንደመለሰለት መዘገባችን ይታወሳል፡፡

በድጋሚ የምርመራ መዝገቡ እንደደረሰው ያረጋገጠው የፌዴራል ጠቅላይ ዓቃቤ ሕግ፣ የተረከበውን የምርመራ መዝገብ በድጋሚ መርምሮ ክስ ለመመሥረት 15 ቀናት በሕጉ መሠረት እንዲሰጠው ጠይቋል፡፡

የዓቃቤ ሕግን ተጨማሪ የምርመራ ጊዜ ጥያቄ የተቃወመው ተጠርጣሪ ጥላሁን፣ ከታሰረ ጊዜ ጀምሮ ጨለማ ቤት ውስጥ መሆኑንና በተወረወረው ቦምብ እሱም ተጎጂ ቢሆንም፣ ሕክምና ሊያገኝ አለመቻሉን ተናግሮ የዋስትና መብቱ እንዲከበርለት ጠይቋል፡፡

ቦምብ ገዝቶ በማቀበል የተጠረጠረው አቶ ብርሃኑ በበኩሉ፣ የዓቃቤ ሕግን ተጨማሪ ቀናት ጥያቄ በመቃወም በተደጋጋሚ ጊዜ ቀጠሮ እየተጠየቀበት መቆየቱን አስታውቆ፣ ተጨማሪ ጊዜ ሊሰጥ እንደማይገባና ዋስትና እንዲፈቀድለት ጠይቋል፡፡

ዓቃቤ ሕግ በበኩሉ የተጠርጣሪዎችን የዋስትና ጥያቄ ተቃውሟል፡፡ የተፈጸመው ወንጀል ውስብስብ፣ የሰው ሕይወት የጠፋበትና የአካል ጉዳት የደረሰበት መሆኑንም በምክንያትነት አንስቷል፡፡

ፍርድ ቤቱም የግራ ቀኙን ክርክር ከሰማ በኋላ የተጠርጣሪዎችን የዋስትና ጥያቄ ውድቅ በማድረግ፣ ዓቃቤ ሕግ እስከ መስከረም 10 ቀን 2011 ዓ.ም. ድረስ ክስ መሥርቶ እንዲቀርብ ትዕዛዝ ሰጥቷል፡፡