Skip to main content
x
የጠቅላይ ሚኒስትሩ የአዲስ ዓመት ውሎ በቡሬና በዛላምበሳ ግንባሮች
ማክሰኞ መስከረም 1 ቀን 2011 ዓ.ም. በቡሬና በዛላንበሳ ግንባሮች ከኤርትራ ፕሬዚዳንት ኢሳያስ አፈወርቂ ጋር በአዲሱ ወታደራዊ የደንብ ልብስ የተገኙት ጠቅላይ ሚኒስትር ዓብይ አህመድ (ዶ/ር)

የጠቅላይ ሚኒስትሩ የአዲስ ዓመት ውሎ በቡሬና በዛላምበሳ ግንባሮች

ማክሰኞ መስከረም 1 ቀን 2011 ዓ.ም. በኢትዮጵያና በኤርትራ መካከል ከፍተኛ ጦርነት በተካሄደባቸው በቡሬና በዛላምበሳ ግንባሮች ከሁለቱ አገሮች የመከላከያ ሠራዊቶችና ከአካባቢዎቹ ነዋሪዎች ጋር የአዲስ ዓመት በዓል ያሳለፉት ጠቅላይ ሚኒስትር ዓብይ አህመድ (ዶ/ር)፣ የኢትዮጵያ ጦር ውጥረት ከነገሠባቸው የድንበር አካባቢዎች እንዲነሳ መወሰኑን አስታወቁ፡፡

ከኤርትራ ፕሬዚዳንት ኢሳያስ አፈወርቂና ከሁለቱ አገሮች ባለሥልጣናት ጋር ከፍተኛ ጦርነት የተካሄደባቸው የሁለቱ አገሮች ድንበሮች ላይ የሚገኙ ምሽጎች ፈርሰው፣ የየብስ ትራንስፖርት በይፋ መጀመሩን ጠቅላይ ሚኒስትሩ አብስረዋል፡፡

በቡሬም ሆነ በዛላምበሳ ለ20 ዓመታት ያህል የተዘጉት ድንበሮች ሲከፈቱ፣ የሁለቱም አገሮች የአካባቢው ነዋሪዎችና ፍጥጫ ውስጥ የነበሩት ወታደሮች የሁለቱን አገሮች ሰንደቅ ዓላማዎች በማውለብለብ በሆታና በጭፈራ በዓሉን አንድ ላይ አክብረዋል፡፡

ጠቅላይ ሚኒስትር ዓብይ (ዶ/ር) ከቡሬና ከዛላምበሳ ግንባሮች ሲመለሱ በቦሌ ዓለም አቀፍ ኤርፖርት በሰጡት መግለጫ፣ በሁለቱ አገሮች ድንበር የተከናወነው የአዲስ ዓመት መቀበያ በዓል አስደሳች ነበር ብለዋል፡፡ የበዓሉ አከባበር የተከናወነው አዲሱን ዓመት በጋራ ለማክበር ቀደም ሲል ቃል በመገባቱ መሆኑን አስታውሰው፣ ‹‹. . . በዛሬው ዕለት ተሳክቶልን ድንበር በማፍረስ በጋራ አዲስ ዓመት ማክበር ችለናል፤› ብለዋል፡፡

‹‹በዛሬው ዕለት በነበረው ሁነት ያየነው ነገር እጅግ በጣም የሚያሳዝን ነው፤›› ብለው፣ ‹‹የሁለቱም አገሮች ወታደሮች ሙቀት ባለው ምሽግ ውስጥ ለባንዲራ ክብር ሲሉ በጣም ተጎሳቅለዋል፡፡ የሁለቱ አገሮች ባንዲራዎች እኩል ሲውለበለቡ ስናይ ከጦርነት፣ ከፀብና ከጥላቻ ውጪ በፍቅርና በሰላም እኩል እንዲውለበለቡ ማድረግ እየተቻለ፣ በተቃርኖ የተወሰነው አሳዛኝ ነው፡፡ ነገር ግን ትምህርት የምንወስድበት ሊሆን ይገባል፤›› ሲሉ አስረድተዋል፡፡ በምሽግ ውስጥ የነበሩ ወታደሮችም ከዕድሜያቸው በላይ መጎሳቆላቸውን ተናግረዋል፡፡

‹‹ከዚህ በኋላ ከሌሎች አገሮች ጋርም ሆነ እርስ በርስ ሰው ለመግደል መበርታት የለብንም፡፡ ይልቁንም ዕውቀታችንና ጉልበታችንን በመሰብሰብ የሚራቡትን ለማገዝና ራስን መለወጥ ላይ መበርታት አለብን፤›› ሲሉም አስታውቀዋል፡፡

ጠቅላይ ሚኒስትሩ የአገር መከላከያ ሠራዊቱ ከመስከረም 1 ቀን 2011 ዓ.ም. ጀምሮ በሁለቱ አገሮች ድንበሮች የነበረውን የውጥረትና የጦርነት ስሜት በከፍተኛ ደረጃ በመቀነስ፣ ወደ ጦር ሠፈሩ በመመለስ ያገግማል ብለዋል፡፡ ወደፊትም የሚሠለጥንበትና ራሱን የሚያበቃበት ሁኔታ ይፈጠራል በማለት፣ ውጥረት ውስጥ ከነበረው ድንበር መነሳቱን አረጋግጠዋል፡፡ በኤርትራም በኩል ተመሳሳይ ዕርምጃ ይወሰዳል ብለዋል፡፡

‹‹በእኛ በኩል ሠራዊታችን ሙሉ በሙሉ ራሱን እስኪያደራጅ ድረስ ባለው ጊዜ ውስጥ የአካባቢውን አርሶ አደር በማገዝ ወደ ልማት ትኩረት ያደርጋል፡፡ ከዚህ በኋላ ግን ሙሉ ቁመና ያለው ሠራዊት እንዲሆንና መለዮውን በትክክል የሚያከብር፣ ሠልፍ የሚያሳምር፣ ሥራዎቹን የመከወን ብቃት ያለው፣ ለውጊያ ዝግጅት ያደረገና ከተዋጋ የሚያሸንፍ ሆኖ እንዲደራጅ ማድረግ በቀጣይ የምናከናውነው ይሆናል፤›› ብለዋል፡፡

የአገር መከላከያ ሠራዊቱ እንደ አዲስ መዋቀሩን ያስታወቁት ጠቅላይ ሚኒስትሩ፣ በአዲሱ አደረጃጀት መሠረት ራሱን አብቅቶ የአገር ሉዓላዊነት በመጠበቅና በልማት ሥራዎች በመሳተፍ፣ የሕዝብና የአገር አለኝታ መሆኑን ለማረጋገጥ የሚዘጋጅበት አዲስ ዓመት እንደሚሆን አስረድተዋል፡፡

በአገር መከላከያ ሠራዊት አዲስ የደንብ ልብስ ለብሰው በቡሬና በዛላንበሳ ግንባሮች የተገኙት ጠቅላይ ሚኒስትር ዓብይ አህመድ (ዶ/ር) በሠራዊቱ ውስጥ የሌተና ኮሎኔል ማዕረግ እንደነበራቸው የሚታወስ ሲሆን፣ በአሁኑ ጊዜ የሠራዊቱ ጠቅላይ አዛዥ ናቸው፡፡