Skip to main content
x
ሕወሓት 11 የሥራ አስፈጻሚ ኮሚቴ አባላትን መረጠ

ሕወሓት 11 የሥራ አስፈጻሚ ኮሚቴ አባላትን መረጠ

ሕዝባዊ ወያነ ሓርነት ትግራይ (ሕወሓት) እያካሄደ ባለው 13ኛ ድርጅታዊ ጉባዔ 11 የሥራ አስፈጻሚ ኮሚቴ አባላትን መረጠ፡፡

የድርጅቱ የሥራ አስፈጻሚ ኮሚቴ አባላት በመሆን የተመረጡት ደብረ ጽዮን ገብረ ሚካኤል (ዶ/ር)፣ ወ/ሮ ፈትለ ወርቅ ገብረ እግዚአብሔር፣ አቶ አስመላሽ ወልደ ሥላሴ (አባይ ነብሶ)፣ አቶ ዓለም ገብረ ዋህድ፣ አቶ ጌታቸው አሰፋ፣ አቶ ጌታቸው ረዳ፣ ወ/ሮ ኬሪያ ኢብራሂም፣ አብርሃም ተከስተ (ዶ/ር)፣ አክሊሉ ኃይለ ሚካኤል (ዶ/ር)፣ አቶ በየነ ምክሩና አዲስ ዓለም ባሌማ (ዶ/ር) ናቸው፡፡ ጉባዔው ደብረ ጽዮን ገብረ ሚካኤል (ዶ/ር) እና ወ/ሮ ፈትለ ወርቅ ገብረ እግዚአብሔር የድርጅቱ ሊቀመንበርና ምክትል ሊቀመንበር አድርጎ መርጧል፡፡

በተያያዘ ዜና፣ ድርጅቱ ዛሬ መስከረም 21 ቀን 2011 ዓ.ም. ጠዋት 55 የማዕከላዊ ኮሚቴ አባላትን መርጧል፡፡

ሕወሓት በጉባዔው 65 ዕጩዎችን ለማዕከላዊ ኮሚቴ አባልነት አቅርቦ የነበረ ሲሆን፣ በተደረገው የድምፅ አሰጣጥ 55 አባላትን ለማዕከላዊ ኮሚቴ መርጧል፡፡

በማዕከላዊ ኮሚቴ አባልነት ከተመረጡት መካከል የድርጅቱ ሊቀመንበርና ትግራይ ክልል ርዕሰ መስተዳድር ደብረ ጽዮን ገብረ ሚካኤል (ዶ/ር)፣ የቀድሞው የመንግሥት ኮሙዩኒኬሽን ጉዳዮች ጽሕፈት ቤት ኃላፊ ሚኒስትር አቶ ጌታቸው ረዳ፣ የኢሕአዴግ ጽሕፈት ቤት ኃላፊ ወ/ሮ ፈትለ ወርቅ ገብረ እግዚአብሔር፣ በፓርላማ የመንግሥት ተጠሪ አቶ አስመላሽ ወልደ ሥላሴ፣ የገንዘብና ኢኮኖሚ ትብብር ሚኒስትሩ አብርሃም ተከስተ (ዶ/ር)፣ የፌዴሬሽን ምክር ቤት አፈ ጉባዔ ወ/ሮ ኬሪያ ኢብራሂም፣ የትግራይ ክልል ኮሙዩኒኬሽን ጉዳዮች ጽሕፈት ቤት ኃላፊ አቶ ረዳኢ ሐለፎም፣ የቀድሞ የብሔራዊ ደኅንነትና መረጃ አገልግሎት ዋና ዳይሬክተር አቶ ጌታቸው አሰፋ ይገኙበታል፡፡

የኢሕአዴግ አባል ድርጅቶች የሆኑት ኦሕዴድና ብአዴን ስማቸውን ወደ ኦዴግና አዴግ ቢቀይሩም፣ ሕወሓት ስሙን እንደማይቀይርና የፓርቲውም ፕሮግራም አብዮታዊ ዴሞክራሲ ሆኖ እንደሚቀጥል አስታውቋል፡፡

ካሁን ቀደም የማዕከላዊ ኮሚቴ አባላት 45 የነበሩ ሲሆን፣ ጉባዔያቸውን ያደረጉት ኦዴግ፣ አዴግና ሕወሓት የማዕከላዊ ኮሚቴ አባላትን ቁጥር ወደ 55 አሳድገዋል፡፡

ሕወሓት በጉባዔው 12 አንጋፋ የድርጅቱ አባላትን በክብር ማሰናበቱን አስታውቋል፡፡