Skip to main content
x
ክቡር ሚኒስትር ከአንድ የምርጫ ቦርድ ኃላፊ ጋር ምሳ እየበሉ ነው

ክቡር ሚኒስትር ከአንድ የምርጫ ቦርድ ኃላፊ ጋር ምሳ እየበሉ ነው

[ክቡር ሚኒስትሩ ተክዘው ቴሌቪዥን እያዩ ሚስታቸው ገቡ]

  • ሰሞኑን ምን ሆነሃል? ትክክል አይደለህም፡፡
  • አገር ላይ የሚሠራውን አታይም እንዴ?
  • ምን ተሠራ?
  • እኔ ለአገሬ የዋልኩትን ውለታ እንዴት ታይዋለሽ?
  • አንተ መቼ ሕይወት ነበረህ? ሙሉ ሕይወትህን ለአገርህ አይደል እንዴ የሰጠኸው?
  • ጎሽ ምን ላድርግሽ፡፡ አሁን እኔ መሰናበት ነበረብኝ?
  • የምን ስንብት ነው?
  • አንቺ ሚዲያ አትከታተይም እንዴ?
  • እኔ እኮ ፊልም ነው የሚመቸኝ፡፡
  • ታዲያ የአገሪቱ ፖለቲካ ፊልም ከሆነ ቆይቷል እኮ?
  • ቢሆንም እኔ የውጭ እንጂ የአገር ውስጥ ፊልም አይመቸኝም፡፡
  • አንቺማ ደልቶሻል፡፡
  • ምንድነው የሆንከው?
  • ይኸው ሕይወቴን የሰዋሁለት ፓርቲ አንቅሮ ተፋኝ፡፡
  • ለምን?
  • ስሚ ልጅነቴን ብትይ ወጣትነቴን፣ ከዚያም ሲልቅ ጎልማሳነቴንና የሽምግልና ዘመኔን የሰጠሁት ፓርቲ ዝም ብሎ ይሸኘኛል?
  • ከሸኙህማ ለአንተም ግልግል ነው፡፡
  • ፖለቲካ እኮ ሱስ ነው፡፡
  • የምን ሱስ ነው?
  • ሴትዮ ፖለቲካ ለእኛ ሁሉ ነገራችን ነው፡፡
  • እንዴት ሆኖ?
  • የእኛ ቢዝነስ እኮ ከፖለቲካው ጋር የተጣመረ ነው፡፡
  • ምን እያልክ ነው?
  • ቢዝነስ ውስጥ የገባነው እኮ ፖለቲካውን በመቆጣጠራችን ነው፡፡
  • አሁንም ግን ቢዝነሳችን ጥሩ እየሠራ ነው፡፡
  • በዚያ ላይ አሁን የኢሕአዴግ ሥራ አስፈጻሚ ተሰበሰበ ሲባል እንኳን ከሕዝቡ እኩል ልስማ?
  • ምን ችግር አለው ጓደኞችህ አይደሉ ቀድመው ይነግሩሃል፡፡
  • አሁን የገባው ኃይል እኮ እኛን ነባሮቹን ማየት ያንገሸግሸዋል፡፡
  • እና ከጨዋታ ውጪ ሆኛለሁ ነው የምትለኝ?
  • ነገርኩሽ እኮ ሳስበው ራሱ ይጨንቀኛል፡፡
  • በቃ ጠቅልለህ ቢዝነሱን ማሯሯጥ ነው የሚሻለው፡፡
  • የቢዝነሱ ጨዋታስ መቼ ገባሽ?
  • እንዴት ማለት?
  • ቢዝነስ እኮ ያለ ፖለቲካ አይሠራም፡፡
  • ምን አገናኛቸው?
  • ረሳሽው እንዴት ስንት የመንግሥት ሥራ ያለ ጨረታ እንደምንሠራ?
  • አሁን ተወዳድረን እንሠራለና?
  • ተወዳድረንማ ማሸነፍ ብንችልማ በፊትም እንወዳደር ነበር፡፡
  • ምን እያልከኝ ነው ታዲያ?
  • ከፖለቲካው ከወጣሁ ከቢዝነሱም እንደምወጣ አትጠራጠሪ፡፡
  • ለዚህ ነው የኢትዮጵያ ፖለቲካ የሚያስጠላው፡፡
  • ስለዚህ ቢዝነሳችንም ያልቅለታል ማለት ነው፡፡
  • ታዲያ ምን ተሻለ?
  • ወደ ፖለቲካው በአገኘሁት መንገድ መመለስ አለብኝ፡፡
  • ይኸው አንቅረው ተፉኝ እያልክ አይደለ እንዴ?
  • እሱማ ልክ ነሽ ግን ሌላ መንገድ መፈለግ ነዋ፡፡
  • ሌላ ምን ዓይነት መንገድ?
  • እኔማ አንድ ነገር እያሰብኩ ነበር፡፡
  • ምን?
  • ባቋቁም ምን ይመስልሻል?
  • ምንድነው የምታቋቁመው?
  • አዲስ ፓርቲ!

[ክቡር ሚኒስትሩ ከደላላ ወዳጃቸው ጋር አንድ ሆቴል ተገናኝተው እያወሩ ነው]

  • ምንድነው ደብሮሃል?
  • እንዴት አይደብረኝ?
  • ምን ሆንክ?
  • እንደ ዕቃ ተጠቅመው ሲጥልዎት እያየሁ እንዴት አይደብረኝ?
  • እስኪ አታስታውሰኝ፡፡
  • ክቡር ሚኒስትር እኔ እኮ በጣም እየተጨነቅኩ ነው፡፡
  • ምንድነው ያስጨነቀህ?
  • ቢዝነሶቻችንን ሳስባቸው ዝም ብዬ በቀን ራሱ መቃዠት ጀምሬያለሁ፡፡
  • ምንድነው የሚያስቃዥህ?
  • ቢዝነሶቻችንን በእርስዎ ተገን ነበር የሚንቀሳቀሱት እኮ?
  • አውቃለሁ ግን ችግር የለውም፡፡
  • እንዴት ክቡር ሚኒስትር?
  • በሩን ሲዘጉብን ሌላ በር ሠርተን መግባት ነዋ፡፡
  • አልገባኝም?
  • አዲስ ፓርቲ እናቋቁማለን፡፡
  • እየቀለዱ ነው ክቡር ሚኒስትር?
  • ሰውዬ በዚህ ጊዜ ቀልድ አይቀለድም፡፡
  • ታዲያ የፖለቲካ ፓርቲ ማቋቋሙ እንደ ቢዝነሱ ቀላል ይሆናል ብለው ያስባሉ?
  • እንዲያውም እኛ ያልነካነው ቢዝነስ እሱ ነው፡፡
  • እንዴት?
  • ምንም ፖለቲካ የማያውቁት አይደሉ እንዴ ፓርቲ እያቋቋሙ ቢዝነስ ሲሠሩ የነበሩት?
  • እሱስ እውነትዎን ነው፡፡
  • አየህ እንደ እኛ ዓይነቱ በፖለቲካ ምራቁን ዋጥ ያደረገ ሲይዘው ቢዝነሱ እንዴት አሪፍ ሊሆን እንደሚችል አስበው፡፡
  • እኔማ ግራ ገብቶኝ ነው፡፡
  • ምኑ ነው ግራ የገባህ?
  • እንዴት ነው ፓርቲ የምናቋቁመው?
  • ስማ እኔ እኮ ከልጅነቴ ጀምሮ ያደግኩበትና ጥርሴን የነቀልኩበት ቢዝነስ ነው፡፡
  • ያው ያኔ እኮ በትጥቅ ትግል ነው እናንተ ፖለቲካውን የተቀላቀላችሁት፡፡
  • እሱማ ያለፈበት ፋሽን ነው ሲባል አልሰማህም?
  • ክቡር ሚኒስትር አሁን እኮ የሐሳብ የበላይነት ያለው ፖለቲካ ነው ማሸነፍ የሚችለው?
  • ለእሱስ ቢሆን መቼ እናንሳለን?
  • ያው ፋሽን አልፎብዎታል ብለው እኮ ነው ያሰናበትዎት ብዬ ነው፡፡
  • ስማ አዲስ ስትራቴጂ ይዘን ነው ጠንካራ ፓርቲ የምንመሠርተው፡፡
  • ምን ዓይነት ስትራቴጂ?
  • መቼም በርካታ ሰዎች ይህን ለውጥ እንደማይደግፉት ታውቃለህ?
  • ክቡር ሚኒስትር ሰው ሁሉ ተደምረናል እያለ እኮ ነው?
  • እንዳይመስልህ በርካታዎቹ  የተደመሩት አማራጭ ስለሌላቸው በግዴታ ነው፡፡
  • እንደዚያ ነው ብለው ነው ክቡር ሚኒስትር?
  • ነገርኩህ እኮ በተለይ አብዛኛው የቢዝነስ ሰው ጥቅሙ በአንድም በሌላም ስለሚነካበት ለውጡን አይደግፈውም፡፡
  • ግን ሁሉም ተደምሬያለሁ ነው የሚለው፡፡
  • እነዚህን ሰዎች እኮ እኛው ሀብታም ያደረግናቸው ስለሆነ አሁን ውለታቸውን መመለስ አለባቸው፡፡
  • እንዴት አድርገው?
  • በቃ ባላቸው ሀብት እኛን በመደገፍ ጠንካራ ፓርቲ እንድናቋቁም ያደርጉናል፡፡
  • የእኔ ሥራ ታዲያ ምንድነው?
  • እነዚህን ሰዎች ታሰባስባለህ፡፡
  • እነ ማንን?
  • ያኮረፉትን ነጋዴዎች!

[ክቡር ሚኒስትሩ ጡረታ ከወጣ ሌላ ጓደኛቸው ጋር ተገናኝተው እያወሩ ነው]

  • የደበርዎት ይመስላል ክቡር ሚኒስትር?
  • እንዴት አይደብረኝ?
  • ምነው?
  • እኛ ያንን ሁሉ መስዋዕትነት ከፍለን ይህችን አገር 11 በመቶ አሳድገን፣ ዓለም ሁሉ ካስጨበጨብን በኋላ ዝም ብለው ሲያሰናብቱን እንዴት አይደብረኝ?
  • ኧረ በዚሁ ይለፍልን ክቡር ሚኒስትር፡፡
  • ከዚህ በላይ ምን ሊመጣ?
  • ክቡር ሚኒስትር መቼም በሥልጣናችን ዘመን ያልፈጸምነው ሙስና እንደሌለ ያውቃሉ፡፡
  • ስማ የፈለገ ቢሆን አገራችንን እኮ በዓለም መድረክ ያስወደስን መሆኑን አትርሳ፡፡
  • ቢሆንም አለመታሰራችን በራሱ ጥሩ ነው፡፡
  • አሁንም ለራስህ ካልታገልክ በኋላ መቼ ይቀርልሃል?
  • የሰሙት ነገር አለ እንዴ ክቡር ሚኒስትር?
  • የወደቀ ዛፍ ምሳር ይበዛበታል ሲባል አልሰማህም?
  • እሱስ እውነትዎትን ነው፡፡
  • ስለዚህ ተደራጅተን በመታገል መብታችንን ማስከበር አለብን፡፡
  • የምን ትግል ነው?
  • ደርግን የሚያህል ኃይል ታግለን ማሸነፋችንን አትርሳ፡፡
  • ክቡር ሚኒስትር ደርግን እኮ ያሸነፍነው እኛ ሳንሆን ሕዝቡ ነው፡፡
  • እኛ ግን ሁሌም እኛ ነን ያሸነፍነው እያልን ነው የምናወራው፡፡
  • ክቡር ሚኒስትር ልብዎ ግን አሁንም ትልቅ ነው፡፡
  • ማለት?
  • አሁን በዚህ ዕድሜያችን ጫካ ገብተን ታግለን እናሸንፋለን ብለው ነው?
  • እሱማ ፋሽኑ ያለፈበት አካሄድ ነው፡፡
  • ታዲያ እንዴት ነው የምንታገለው?
  • አሁን ትግላችን ፋሽኑን የተከተለ መሆን አለበት፡፡
  • ፋሽኑ ምንድነው?
  • የፖለቲካ ፓርቲ ማቋቋም ነዋ፡፡
  • ለቀቁ ልበል ክቡር ሚኒስትር?
  • ከሥልጣን እንዳስለቀቁኝማ ታውቃለህ አይደል እንዴ?
  • ኧረ እኔ በአዕምሮ ለቀቁ ወይ ነው ያልኩት?
  • ምን እያልክ ነው?
  • እንዴት ብለን ነው አዲስ ፓርቲ የምናቋቁመው?
  • ከዚያ ውጪ የምናሸንፍበት መንገድ የለም፡፡
  • ለመሆኑ ምን ዓይነት ፓርቲ ነው የምናቋቁመው?
  • የአብዮታዊ ዴሞክራሲ እሴቶችን በማስጠበቅ የኒዮሊብራል አስተሳሰብን ድባቅ የሚመታ ፓርቲ ነዋ፡፡
  • ክቡር ሚኒስትር የአገሪቱ ሕዝብ ከ70 በመቶ በላይ ወጣት ከመሆኑ ባሻገር፣ ይህን የአብዮታዊ ዴሞክራሲ ፍልስፍና እንደማይቀበለው መቼም ለእርስዎ አላስረዳዎትም፡፡
  • የእኛ አባላት የተለቀሙና የተነጠሩት እንጂ ወጣቶቹ አይደሉም፡፡
  • ወጣቱን ሳንይዝ የምን ፓርቲ ነው?
  • ነገርኩህ እኮ በአመራር ብቃታቸው የሚታወቁና በአገሪቱ ፖለቲካ ምራቃቸውን የዋጡትን ነው የምንፈልገው፡፡
  • እኮ እነማንን ልንይዝ?
  • ነባሮቹን!

[ክቡር ሚኒስትር ከአንድ የምርጫ ቦርድ ኃላፊ ጋር ምሳ እየበሉ ነው]

  • ዛሬ ለምን እንደፈለግኩህ ታውቃለህ?
  • ለምን ነበር የፈለጉኝ ክቡር ሚኒስትር?
  • ሰሞኑን እንደ እኔ በጡረታ ከተሰናበቱ ጓደኞቼ ጋር ተገናኝቼ ነበር፡፡
  • በቀጣይ ምን ሊሠሩ አሰቡ?
  • በእሱ ጉዳይ ላይ እንድንመካከር አይደል እንዴ የጠራሁህ?
  • እኔ እኮ በእናንተ መልቀቅ ቅር ብሎኛል፡፡ በቀጣይ ለእኛም አስቸጋሪ የሚሆን ይመስለኛል፡፡
  • ምኑ ነው የሚያስቸግራችሁ?
  • ከእናንተ ጋር ስንሠራ እኮ ትዕዛዝ እንቀበላችኋለን ከዚያ እሱን ማስፈጸም ነበር፡፡ አሁን ግን ዴሞክራሲ እየተባለ ከማን ጋር ልንሠራ ነው? ስለዚህ በጣም ያስፈራኛል፡፡
  • ምኑ ነው የሚያስፈራህ?
  • ነገ የእናንተ ዕጣ እኛም ጋ ይመጣል፡፡
  • እንዴት ሆኖ?
  • ያው በቀጣይ የእኛም ተቋም ሪፎርም መደረግ አለበት ተብሎ እኛም መሰናበታችን ይቀራል?
  • ስለዚህ በጊዜ መጠቃቀም ይኖርብናል፡፡
  • ምን አስበው ነው ክቡር ሚኒስትር?
  • ለእኔ እኮ ፖለቲካ ሕይወቴ ነው፡፡ ከልጅነት እስካሁን ድረስ ከፖለቲካ ውጪ ምን አውቃለሁ?
  • ክቡር ሚኒስትር እርስዎስ በደህና ጊዜ ቢዝነሷንም ተቀላጥፈዋታል፡፡
  • ያለ ፖለቲካው ቢዝነሱ የለም፡፡
  • ታዲያ ምን አሰቡ?
  • አዲስ የፖለቲካ ፓርቲ ላቋቁም እያሰብኩ ነው፡፡
  • የምን ፓርቲ ነው?
  • አገሪቱ እኮ በቋፍ ላይ ነው ያለችው፡፡
  • እሱስ እውነትዎትን ነው፡፡
  • ስለዚህ እንደኛ ዓይነቱ በሳል አመራር ፖለቲካውን ሊመራው ይገባል፡፡
  • ምን ዓይነት ፍልስፍና ያለው ፓርቲ ሊያቋቁሙ ነው?
  • አብዮታዊ ዴሞክራሲ የሚያራምድ ነዋ፡፡
  • ክቡር ሚኒስትር ፓርቲዎች ሁሉ ከዚህ ፍልስፍና እየወጡ ዴሞክራሲ እናራምዳለን በማለት ስያሜያቸውን እየቀሩ እኮ ነው፡፡
  • እኛም ስያሜያችን ውስጥ ዴሞክራሲ የሚለውን ቃል መጠቀም እንችላለን፡፡
  • ለመሆኑ የፓርቲው ስያሜ ምንድነው የሚለው?
  • ቀ.ሥ.ና.ዴ.ፓ!
  • ምን ማት ነው?
  • የቀድሞ ሥርዓት ናፋቂ ዴሞክራሲያዊ ፓርቲ!