Skip to main content
x
የመስከረም ወር የዋጋ ግሽበት በ12 በመቶ ጭማሪ ማሳየቱን ማዕከላዊ ስታቲስቲክስ ኤጀንሲ ይፋ አደረገ
በታላቁ የገበያ ማዕከል መርካቶ የሚገበዩ ሸቀጦችና የንግድ እንቅስቃሴ ገጽታ

የመስከረም ወር የዋጋ ግሽበት በ12 በመቶ ጭማሪ ማሳየቱን ማዕከላዊ ስታቲስቲክስ ኤጀንሲ ይፋ አደረገ

ተንከባላይ የምግብ ዋጋ ግሽበት በ17 በመቶ ጨምሯል

የማዕከላዊ ስታቲስቲክስ ኤጀንሲ ይፋ ያደረገው የዋጋ ግሽበት መረጃ እንዳመለከተው፣ በተያዘው ወር የተመዘገበው የዋጋ ግሽበት በ2010 ዓ.ም. መስከረም ወር ላይ ከተመዘገበው አጠቃላይ የዋጋ ግሽበት አኳያ የ12 በመቶ የዋጋ ጭማሪ ሲታይ፣ የምግብ ዋጋ ግሽበቱም ካለፈው ዓመት መስከረም ወር ይልቅ በዚህ ዓመት የ13.5 በመቶ ዋጋ ጭማሪ ተመዝግቧል፡፡

ኤጀንሲው ለሪፖርተር በላከው መግለጫ መሠረት፣ መስከረም ወር ለታየው የዋጋ ጭማሪ ምክንያቱ በዚህ ዓመት የተመዘገበው አጠቃላይ የዋጋ መመዘኛ ኢንዴክስ ወደ 197 በመቶ ማሻቀቡ ነው፡፡ ባለፈው ዓመት መስከረም ወር ላይ የተመዘገበው አጠቃላይ የዋጋ መመዘኛ ኢንዴክስ 175.8 በመቶ እንደነበር ኤጀንሲው አስታውቋል፡፡ አጠቃላይ የዋጋ መመዘኛ ኢንዴክስ ማለት የአንድ ምርት የወቅቱ ዋጋ ካለፈው ዓመት ዋጋ ጋር ተካፍሎና በመቶ ተባዝቶ የሚገለጽበት የሸማቾች የዋጋ መመዘኛ ነው፡፡

በዚሁ መሠረትም የምግብ ዋጋ ግሽበትን የተመለከተው የኤጀንሲው የመስከረም ወር ሪፖርት፣ ከ2010 ዓ.ም. መስከረም ወር አኳያ የ13.5 በመቶ ጭማሪ መታየቱን አስታውሶ፣ ለዚህም ጭማሪ በ2011 ዓ.ም. የተመዘገበው የምግብ ዋጋ መመዘኛ ኢንዴክስ 207.6 በመቶ በመድረሱ ነው፡፡ ባለፈው ዓመት መስከረም ወር ላይ የተመዘገበው የምግብ ዋጋ መመዘኛ ኢንዴክስ 182.9 በመቶ እንደነበር ሪፖርቱ ይጠቁማል፡፡ በዚህ መሠረት በተያዘው ወር  ዳቦና እህል፣ አትክልትና ፍራፍሬ፣ ሥጋ፣ ቅቤ፣ ወተት፣ አይብና ዕንቁላል እንዲሁም የቅመማ ቅመም ሸቀጦች ዋጋ ላይ ጭማሪ ታይቷል፡፡ ሆኖም ስኳር፣ ማርና ቸኮሌት መጠነኛ ቅናሽ ማሳየታቸው ተጠቅሷል፡፡

ከዚህ ባሻገር ምግብ ነክ ያልሆኑ የዋጋ ጠቋሚ ክፍሎችም በዚህ ዓመት መስከረም ወር ያሳያዩት ጭማሪ ከዓምናው መስረከም ወር አኳያ ሲታይ፣ የ10.3 በመቶ ዕድገት እንዳለው ሲታወቅ፣ የዋጋ ጭማሪው እንዲታይ ካደረጉት መካከል አልባሳትና መጫሚያ፣ የቤት ክብካቤና ኢነርጂ፣ የቤት ዕቃዎችና የቤት ማስጌጫዎች፣ የቤት መሥሪያ ቁሳቁሶች፣ የትራንስፖት፣ የሕክምናና በሆቴሎች የሚዘጋጁ መጠጦችና ምግቦች ላይ የታየው የዋጋ ጭማሪ ምግብ ነክ ላልሆነው የዋጋ ግሽበት አስተዋጽኦ ማድረጋቸው ተብራርቷል፡፡

ይህም ይባል እንጂ የ12 ወራት ተንከባላይ አማካይ የዋጋ ግሽበት በሚባለውና ረዘም ያለ ጊዜ የሚወከልበት የዋጋ ግሽበት ሁኔታን በሚያሳየው የጠቋሚ መመዘኛው መሠረት፣ በመስከረም ወር የተመዘገበው አጠቃላይ የ12 ወራት ተንከባላይ አገራዊ አማካይ የዋጋ ግሽበት ካለፈው ዓመት ተመሳሳይ ወቅት አኳያ የ13.8 በመቶ ዕድገት አሳይቷል፡፡ ከዚህ ውስጥ የምግብ ዋጋ ግሽበት የ17.1 በመቶ ዕድገት ተመዝግቦታል፡፡ ምግብ ነክ ያልሆኑ ምርቶች ያሳዩት የ12 ወራት ተንከባላይ አማካይ አገራዊ የዋጋ ግሽበትም በአሥር በመቶ ጭማሪ አሳይቷል፡፡

ይህም ይባል እንጂ በመስከረም ወር የታየው አጠቃላይ የዋጋ ግሽበት ከነሐሴ ወር ጋር በሚነፃፀርበት ወቅት፣ የታየው ጭማሪ የ1.1 በመቶ ብቻ እንደሆነም ኤጀንሲው አስታውቋል፡፡  ይሁን እንጂ ይህ የአጭር ጊዜ የዋጋ ክስተትን አመላካች ነው፡፡

መንግሥት በተለይም የኢትዮጵያ ብሔራዊ ባንክ ካለፈው ዓመት ጀምሮ የአገሪቱን የዋጋ ግሽበት መጠን ባለ ነጠላ አኃዝ እንዲሆን ለማድረግ እንደሚንቀሳቀሱ ሲገልጹ ቢቆዩም፣ የዋጋ ግሽበቱ በተለይ ባለፈው ዓመት እስከ 17 በመቶ ያሻቀበበት አጋጣሚ ተፈጥሮ ነበር፡፡ ለዚህ ሲቀርቡ ከነበሩ ምክንያቶች መካከል የፖለቲካው አለመረጋጋት በተፈጠረው ጫና ሳቢያ ሸቀጦች እንደልብ ወደሚፈለጉባቸው አካባቢዎች እንዲጓጓዙ ማድረግ ባለመቻሉ ጭምር እንደሆነ የገንዘብና ኢኮኖሚ ትብብር ሚኒስቴር የገለጸበት አጋጣሚ ይታወሳል፡፡