Skip to main content
x
ክቡር ሚኒስትሩ ከአንድ ዳያስፖራ ጋር እያወሩ ነው

ክቡር ሚኒስትሩ ከአንድ ዳያስፖራ ጋር እያወሩ ነው

[ክቡር ሚኒስትሩ ከሚስታቸው ጋር ቁርስ እየበሉ እያወሩ ነው]

  • ቶሎ ቶሎ ብዪ እንጂ?
  • ሰሞኑን ምግብ አልበላ ብሎኛል፡፡
  • ምን ሆንሽ?
  • ጊዜው የምን መሆኑን ረሳኸው እንዴ?
  • የፍቅርና የመደመር ጊዜ ነዋ፡፡
  • ለእኛ ግን የፀብና የመቀነስ ጊዜ ነው፡፡
  • ምን እያልሽ ነው?
  • የግብር ጊዜ መሆኑን ረሳኸው እንዴ?
  • ደረሰ አይደል?
  • ስማ ይኼን ጊዜ ተጠንቅቀን ካላለፍን እኮ እንዳልኩህ የምንቀነስበት ጊዜ ነው፡፡
  • ማን ነው የሚቀንሰን?
  • ግብራችንን በአግባቡ ካልከፈልን ልንቀነስ እንችላለን፡፡
  • ታዲያ እንዴት እየሆነልሽ ነው?
  • ይኸው ቀን ተሌት ደፋ ቀና ብዬ ነገሮችን እያስተካከልኩ ነው፡፡
  • እኛ እኮ ደረጃ ሀ ግብር ከፋዮች ስለሆንን መጠንቀቅ አለብን፡፡
  • እንግዲህ በተሰማራንባቸው ዘርፎች ያሉት ድርጅቶቻችን ግብራቸውን እንዲከፍሉ እያስደረኩ ነው፡፡
  • ስለዚህ የተሰማራንባቸው ሁሉም ዘርፎች አዋጪ ናቸው ማለት ነው?
  • በማኑፋክቸሪንግ፣ በሰርቪሱና በሪል ስቴቱ አሁንም ጥሩ እየሠራን ነው፡፡
  • ሁሉም ነገር አስተማማኝ ነው ልበል?
  • እኔማ እንደፈራሁት አይደለም፣ ምክንያቱም ባለፉት ሦስት ዓመታት አገሪቱ ካሳለፈችው ችግር አንፃር እኛም ችግር ውስጥ መሆን ነበረብን፡፡
  • ይኼ እኮ አስደሳች ዜና ነው፡፡
  • የሚገርምህ ለሪል ስቴት የሰጡንን ቦታ አልገነባችሁበትም ብለው ሊነጥቁን ሙከራ አድርገው ነበር፡፡ ግን እንደ ምንም ብዬ አስጥዬዋለሁ፡፡
  • አንቺ እኮ ጀግና ነሽ፡፡
  • ብቻ ከተሰማራንባቸው በአንደኛው ዘርፍ ጥሩ አልሠራንም፡፡
  • በየትኛው ዘርፍ?
  • ባለፈው ትንሽ ደከም ብለንበታል ያልኩህ ዘርፍ ነዋ፡፡
  • እስኪ አስታውሽኝ የቱ ነበር?
  • የማዕድን ዘርፉ ላይ በጣም ተዳክመናል፡፡
  • ለምን ተዳከምን?
  • ለእሱማ በሚዲያም እንደሰማኸው የተለያዩ ምክንያቶች አሉት፡፡
  • ምንድናቸው ምክንያቶቹ?
  • የአካባቢው ወጣቶች በአንድ በኩል አላሠራ ብለውናል፡፡
  • ለምንድነው አላሠራ ያሉት?
  • ከዘርፉ እኛ ተጠቃሚዎች አልሆንም እያሉ ነው፡፡
  • ድርጅታችን የሚቀጥረው የአካባቢውን ወጣቶች አይደል እንዴ?
  • እነሱ የሚፈልጉት መቀጠር ብቻ አይደለም፡፡
  • ሌላ ምን ይደረግላቸው?
  • የማዕድኑ ባለቤት እኛ ስለሆንን እኛ ራሳችን እናውጣ ነው የሚሉት፡፡
  • ምን?
  • የሚገርምህ እኛም ይኼንኑ አውቀን የተወሰነ ድርሻ እንዲኖራቸው አድርገን ነበር፡፡
  • ታዲያ ምን አሉ?
  • ሙሉ ለሙሉ እኛ ካልያዝነው መሥራት አትችሉም እያሉ ነው፡፡
  • አሁንስ ሥርዓተ አልበኝነቱ በዛ፡፡
  • ስማ አገሪቷን በሙሉ ሥርዓት አልበኛ አይደል እንዴ የወረራት?
  • መንግሥት ግን ምን እየሠራ ነው?
  • እሱ ጥያቄ እኮ አንተን ነው የሚመለከተው፡፡
  • አሁንስ በዛ፡፡
  • ስለዚህ ሥርዓተ አልበኝነቱ ከባድ ስለሆነ መሥራት አልቻልንም፡፡
  • መንግሥት እያለማ እንደዚህ ዓይነት ሥርዓተ አልበኝነት አይሠራም፡፡
  • ስማ ውኃ እየዘጉ ገንዘብ አምጡ የሚሉ አካላት እንዳሉ አልሰማህም?
  • ይኼማ ፈጽሞ ተቀባይነት የለውም፡፡
  • ሕዝቡ ግራ ተጋብቶ ነው ያለው፡፡
  • መንግሥት እያለ ግራ መጋባት አያስፈልግም፡፡
  • ሕዝቡማ መንግሥት እንዳለ ያውቃል፣ ግራ ያጋባው ሌላ ነገር ነው፡፡
  • ምንድነው ግራ ያጋባው?
  • ብዛታችሁ!

[ክቡር ሚኒስትሩ የቤት ውሻ ፈልገው የእንስሳት ሐኪም ጋ ይሄዳሉ]

  • ጤና ይስልኝ ክቡር ሚኒስትር?
  • እንዴት ነህ ወዳጄ?
  • በጣም ነው የደነገጥኩት፡፡
  • ምን አስደነገጠህ?
  • በቲቪ ብቻ ነበር የማውቅዎት፡፡
  • ዛሬ በአካል እንተዋወቃለና፡፡
  • ምን ልርዳዎት ክቡር ሚኒስትር?
  • አንድ ነገር እንድታማክረኝ ፈልጌ ነበር፡፡
  • ምን ይሆን ክቡር ሚኒስትር?
  • ውሻዬ ጠፋችብኝ፡፡
  • ከእርስዎ ግቢ እንዴት ልትጠፋ ትችላለች?
  • ለምን አትጠፋም?
  • ማለቴ ያው ከፍተኛ ጥበቃ የሚደረግለት ግቢ ስለሆነ ልታመልጥ አትችልም ብዬ ነዋ፡፡
  • እሱማ ውሻዋም ቤቷ ውስጥ በሰንሰለት ታስራ ነው የምትውለው፡፡
  • ታዲያ እንዴት ልትጠፋ ቻለች?
  • እኔማ ብዙ እየጮኸች ስትበጠብጠኝ ትንሽ ትናፈስ ብዬ ብለቃት በራ ጠፋች፡፡
  • ለነገሩ ብዙ ጊዜ የሚታሰሩ ውሾች ሲለቀቁ በዚያው በረው ይጠፋሉ፡፡
  • እኔማ ባለቀኩዋት ብዬ ተፀፀትኩ፡፡
  • ባይለቁዋት ደግሞ አውሬ ትሆንና የበጠሰች ዕለት አታስተርፍዎትም ነበር፡፡
  • እኔም እኮ እሱን ፈርቼ ነው የለቀኩዋት፡፡
  • ታዲያ ምን ልርዳዎት ክቡር ሚኒስትር?
  • ሰሞኑን መቼም የጠቅላይ ሚኒስትሩን ንግግር ሰምተሃል?
  • አልሰማሁም ክቡር ሚኒስትር፡፡
  • ይኸውልህ እሳቸው አራት ዓይነት ውሻዎች እንዳሉ ነግረውናል፡፡
  • እሺ ክቡር ሚኒስትር፡፡
  • ስለዚህ አራቱም ዓይነት ውሻዎች እንዲኖሩኝ እፈልጋለሁ፡፡
  • ምን ምንድን ናቸው?
  • የመጀመርያው lap dog የሚሏት ናት፡፡
  • እሺ፡፡
  • እንደዚህ ዓይነቷን ውሻ እግርህ ላይ አድርገህ እያሻሸህ የምታጫውታት ናት፡፡
  • እሺ ክቡር ሚኒስትር፡፡
  • ለዚች ውሻ ስም አውጥቼላታለሁ፡፡
  • ማን ሊሏት ነው?
  • ቆንጂት፡፡
  • ይቀጥሉ ክቡር ሚኒስትር፡፡
  • ሁለተኛው ደግሞ attack dog የሚሉት ነው፡፡
  • እሺ፡፡
  • እንዲህ ዓይነቱ ውሻ ደግሞ ጠላትህን የሚያጠቃልህና የሚያስፈራራልህ ነው፡፡
  • በጣም ጥሩ ክቡር ሚኒስትር፡፡
  • ለዚህም ውሻ ስም አውጥቼለታለሁ፡፡
  • ማን አሉት?
  • ሺፈራው፡፡
  • ሌላኛውስ ክቡር ሚኒስትር?
  • ሦስተኛው ደግሞ guide dog ይባላል፡፡
  • እሺ ክቡር ሚኒስትር፡፡
  • ይኼ ደግሞ እኔ ዓይነ ሥውር ባልሆንም ብቻዬን ወክ ሳደርግ ይዤው የሚመራኝና የምኩራራበት ውሻ ነው፡፡
  • ጥሩ ነው ክቡር ሚኒስትር፡፡
  • ለእሱም ስም አውጥቼለታለሁ፡፡
  • ማን አሉት?
  • መኩሪያ፡፡
  • የመጨረሻውስ ክቡር ሚኒስትር?
  • አራተኛው ደግሞ watchdog ይባላል፡፡
  • እሺ ክቡር ሚኒስትር፡፡
  • የዚህ ውሻ ዋነኛ ሥራ ደግሞ ግቢዬን ነቅቶ መጠበቅ ነው፡፡
  • ማን ሊሉት ነው ይኼን ውሻ?
  • ዓይናማው ነው የምለው፡፡
  • ጥሩ ነው ክቡር ሚኒስትር፡፡
  • አሁን እነዚህን አራት ውሻዎች የት እንደማገኛቸው ትጠቁመኛለህ?
  • አራቱም የሚገኙት አንድ ቦታ አለ፡፡
  • የት ነው?
  • ሚዲያ ውስጥ!

[ክቡር ሚኒስትሩ ከመሥሪያ ቤታቸው የሕዝብ ክንፍ አደረጃጀት ኃላፊ ጋር ቢሯቸው ተገናኝተው እያወሩ ነው]

  • ክቡር ሚኒስትር እየሄድንበት ያለው መንገድ በጣም እያስፈራኝ ነው፡፡
  • የትኛው መንገድ?
  • ክቡር ሚኒስትር በየቦታው እኮ የግጭትና የረብሻ ወሬ ነው የሚሰማው፡፡
  • ይህ ምን እንደሚጠቁም ታውቃለህ አይደል?
  • ምንድነው የሚጠቁመው ክቡር ሚኒስትር?
  • ሥራህን በአግባቡ እየተወጣህ አለመሆንህን ነዋ፡፡
  • ምን ላድርግ ክቡር ሚኒስትር?
  • ይህ ሁላ ረብሻና ግጭት ያለው ከፍተኛ የሆነ የሐሳብ ልዩነት በሕዝቡ ዘንድ ስላለ ነው፡፡
  • አውቃለሁ ክቡር ሚኒስትር፡፡
  • ታዲያ በአንድ ለአምስት አደረጃጀቱ ለምንድነው የሐሳብ ልዩነቱን ማጥፋት ያልቻላችሁት?
  • እኛ ምን እናድርግ ክቡር ሚኒስትር?
  • ምን ማለት ነው?
  • ሕዝቡ ታፍኗል ምናምን ብላችሁ ነፃ ለቀቃችሁትና አስተሳሰቡን ልንቆጣጠረው አልቻልንም፡፡
  • ስማ የልማታችን መሠረት የሆነው የአብዮታዊ ዴሞክራሲ መርህ እየተጣሰ ሌሎች ባዕድ አስተሳሰቦች በሕዝቡ አዕምሮ ውስጥ እየሰረፁ ነው፡፡
  • በዚህ ምክንያት አይደል እንዴ እየተቸገርን ያለነው?
  • ሁሌም የልማታችን ሞዴል እንደሆነችው ቻይና ሕዝቡ አንድ ዓይነት ሐሳብ እንዲኖረው ማድረግ አለብን፡፡
  • ሕዝቡ አንድነት ማለት አንድ ዓይነትነት አይደለም እያለ ሊቀበለን ፈቃደኛ አይደለም፡፡
  • በዚህ ከቀጠልን አንድነታችን ይፈራርሳል፡፡
  • ታዲያ ምን ተሻለን ክቡር ሚኒስትር?
  • እንደነገርኩህ ሕዝቡ ለግጭትና ለረብሻ እየተነሳ ያለው ከእኛ መርህ ውጪ የሆኑ ሐሳቦች አዕምሮ ውስጥ ገብተው ስላቆሸሹት ነው፡፡
  • እሱማ ግልጽ ነው፡፡
  • ስለዚህ በአስቸኳይ እነዚህን ቆሻሻ ሐሳቦች ከሕዝቡ አዕምሮ ውስጥ ማስወገድ አለብን፡፡
  • የጨነቀኝ እኮ እሱ ነው ክቡር ሚኒስትር፡፡
  • ምኑ ነው የጨነቀህ?
  • የሐሳብ ልዩነቱን እንዴት ማስወገድ እንችላለን?
  • እሱን የምንችለው አንድ ነገር በማድረግ ነው፡፡
  • ምን በማድረግ?
  • Brainwash!

[ክቡር ሚኒስትሩ ከአንድ ዳያስፖራ ጋር እያወሩ ነው]

  • አገሪቱን ለመድካት?
  • ይህች የምትለመድ አገር አትመስለኝም፡፡
  • ምን ሆንክ ደግሞ?
  • ሁሉም ነገር ያስፈራል፡፡
  • ባለፈው የመጣኸው በብዙ መነሳሳት አልነበር እንዴ?
  • እኔማ አመጣጤ ባለኝ ሀብትና ዕውቀት አገሬን አገለግላለሁ ብዬ ነበር፡፡
  • ታዲያ ምን ተፈጠረ?
  • አሁንማ ሐሳቤን ቀይሬያለሁ፡፡
  • ለምን?
  • ክቡር ሚኒስትር በቆይታዬ አብዛኛዎቹ ፖለቲከኞች ቴአትረኞች መሆናችሁን ተረድቻለሁ፡፡
  • ምን ማለት ነው?
  • የምታወሩትና የምታደርጉት የሰማይና የምድር ያህል ልዩነት ነው ያለው፡፡
  • ስማ ነገሮችን እየጠበቅክ ያለኸው በምትኖርበት አገር ስታንዳርድ ነው እንዴ? ይኼ እኮ አፍሪካ ነው፡፡
  • ምን እያሉኝ ነው ክቡር ሚኒስትር?
  • ሁሉም ነገር የሚሆነው ቀስ በቀስ ነው፡፡
  • ክቡር ሚኒስትር ምንም ዓይነት መሠረተ ልማት ሳይኖርና ማንም ጎረምሳ ተነስቶ በሚወስንበት አገር ገብታችሁ ኢንቨስት አድርጉ ስትሉ አታፍሩም?
  • ነገርኩህ እኮ ተባብረን ተቋም እንገንባ አይደል እንዴ ያልነው?
  • ቢሆንም እንዲህ ዓይነት ሥርዓተ አልበኝነት በሰፈነበት አገር እንዴት መተባበር እንችላለን?
  • ምን ይደረግ ነው የምትለው?
  • ክቡር ሚኒስትር አብዛኛው ሰው በአቋራጭ የሚከብርበትን መንገድ ነው እኮ የሚፈልገው፡፡
  • ምን ታደርገዋለህ?
  • ባለፉት ዓመታት አገሪቱ 11 በመቶ አድጋለች ምናምን የምትሉት ምንም ትርጉም እንደሌለው ተረድቻለሁ፡፡
  • በአንዴ እንደዚህ አትማረር፡፡
  • ክቡር ሚኒስትር አገሪቱ አድጋለች ምናምን የምትሉትን ቀልድ ብትተውት ያወጣችኋል፡፡
  • ምን እያልክ ነው?
  • በቅርቡ የጤና ጥበቃ ሚኒስቴር 27 በመቶ ሕዝብ የአዕምሮ ጤና ችግር እንዳለበት ይፋ አድርጓል፡፡
  • ምንድነው የምታወራው?
  • ስለዚህ ላለፉት 27 ዓመታት ሕዝቡን ስታሳድጉት አልነበረም፡፡
  • ታዲያ ምን ስናደርገው ነበር?
  • ስታሳብዱት!