Skip to main content
x
ክቡር ሚኒስትሩ ከሌላ ሚኒስትር ጋር በስልክ እያወሩ ነው

ክቡር ሚኒስትሩ ከሌላ ሚኒስትር ጋር በስልክ እያወሩ ነው

[ክቡር ሚኒስትሩ ጠቅላይ ሚኒስትሩ በአውሮፓ የሚያደርጉት ጉዞ ላይ ለመሳተፍ እየተዘጋጁ ነው፡፡ ልብሳቸውን ሲያስተካክሉ ሚስታቸው አገኟቸው]

  • ምነው ሽር ጉድ አበዛህ?
  • ጉዞ አለብኝ፡፡
  • የምን ጉዞ?
  • ወደ አውሮፓ መሄዴ አይቀርም፡፡
  • ምን ልታደርግ ነው አውሮፓ የምትሄደው?
  • አንቺ ግን ሚዲያ መከታተል ተውሽ?
  • ኧረ እከታተላለሁ፡፡
  • ታዲያ ጠቅላይ ሚኒስትሩ አውሮፓን ሊጎበኙ መሆኑን አልሰማሽም?
  • ከእሳቸው ጋር አብረህ ልትጓዝ ነው?
  • እህሳ፡፡
  • ማን ጋብዞህ?
  • በዚህ  ጉዞ ላይ የሚሳተፉት በሥርዓቱ ውስጥ ወሳኝ ሚና ያላቸው ስለሆኑ፣ እኔም ለዚያ ነው የተጋበዝኩት፡፡
  • የሥርዓቱ ወሳኝ ሰው ነኝ እያልከኝ ነው?
  • እሱ ብቻ ሳይሆን አውሮፓን እንደ ቤቴ ስተመላለስኩባት እንደ እኔ ዓይነት የጉዞ ልምድ ያለው ሰው መሄዱ አይቀርም ብዬ ነው፡፡
  • በነገራችን ላይ በዚህ በለውጥ መንግሥት ያላግባብ ወጪ አያወጣም፣ በተለይም የውጭ ጉዞ ወጪ ይቀነሳል ስትሉ አልነበር እንዴ?
  • እሱማ አላስፈላጊ ጉዞዎች ተቀንሰዋል፡፡
  • ግን ከጠቅላይ ሚኒስትሩ ጋር የሚሄደው ባለሥልጣን አልበዛም?
  • እዚህ ላይ አንድ ነገር መሳሳት የለብሽም፡፡
  • ምንድነው እሱ?
  • አንዳንድ ጉዞዎች ከፍተኛ ወጪ ቢኖራቸውም፣ ገቢያቸውም በዚያው ልክ ነው፡፡
  • አልገባኝም?
  • አየሽ ምንም እንኳን መንግሥት ለእንደዚህ ዓይነት ጉዞዎች ከፍተኛ ወጪ ቢያወጣም፣ በኋላ ላይ ጉዞው ፍሬ ሲያፈራ አገራችን በትልቁ ነው የምትጠቀመው፡፡
  • እንዴት እንደምንጠቀም አብራራልኝ እስኪ?
  • ለምሳሌ እኔን ልትወስጂኝ ትችያለሽ፡፡
  • እሺ፡፡
  • ፈረንሣይ በምንድነው የምትታወቀው?
  • በብዙ ነገር ትታወቃለች፡፡
  • እስኪ አንዱን ጥሪልኝ?
  • ለምሳሌ ሽቶ አንዱ ነው፡፡
  • በጣም ጥሩ ሽቶን መውሰድ እንችላለን፡፡
  • እሺ፡፡
  • አሁን እኔ እንደ ዲፕሎማት ስለምሄድ ሻንጣዬ አይፈተሽም፡፡
  • እሺ፡፡
  • ስለዚህ አንድ ሁለት ሻንጣ ሽቶ ይዤ ብመጣ እዚህ ምን ያህል እንደማተርፍ አስቢው፡፡
  • ወይ ጉድ?
  • ከዚህ ጉዞ ብቻ ለእኔ ሦስት ሺሕ ዶላር ቢወጣ፣ እኔ ስመለስ እስከ 20 ሺሕ ዶላር ላተርፍ እችላለሁ፡፡
  • መቼ ይሆን ከዚህ አስተሳሰብ የምትላቀቀው?
  • ይኼ በግለሰብ ደረጃ የሚገባው ብቻ ነው፡፡
  • ሌላ ምን አለ?
  • ለምሳሌ ጠቅላይ ሚኒስትሩ መንግሥትን ወክለው እስከ 100 ሚሊዮን ዶላር ሊያገኙ ይችላሉ፡፡
  • ይኼማ ለአገር የሚጠቅም ነው፡፡
  • እኮ እንደነገርኩኽ አገሪቱም ሆነ እኔ የምንጠቀምበት ጉዞ ነው፡፡
  • ዞረህ ዞረህ ከራስህ አታልፍም በቃ?
  • ስሚ እኔ ሲያልፍልኝ ነው አገሪቱ የሚያልፍላት ብዬ ብዙ ጊዜ ነግሬሻለሁ፡፡
  • ይኼ አካሄድ ግን ብዙ የሚያዘልቅህ አይመስለኝም፡፡
  • ይኸው እያዋራሽኝ ስለጉዞው ኢሜይል ተላከልኝ፡፡
  • ምን ይላል?
  • እንዴ?
  • ምነው?
  • ይኼማ ሊሆን አይችልም፡፡
  • ምንድነው እሱ?
  • ከሚሄዱት መሀል ስሜ የለም፡፡
  • ውይ ሽቶህ የእንትን ሽታ ሊሆን ነው፡፡
  • የምን ሽታ?
  • የውኃ ሽታ!

[ክቡር ሚኒስትሩ የዲስፕሊን ግድፈት የተገኘበትን አማካሪያቸውን ከሥራ ለማሰናበት ቢሯቸው አስጠሩት]

  • በድጋሚ ስላገኙኝ አመሠግናለሁ ክቡር ሚኒስትር፡፡
  • ምንም ችግር የለውም፡፡
  • ጉዳዬን አጣሩት ክቡር ሚኒስትር?
  • በሚገባ ነው ያጣራሁት፡፡
  • ምን አገኙ ታዲያ?
  • ግኝቴማ ከዲስፕሊን ኮሚቴ ውጤት ጋር ተመሳሳይ ነው፡፡
  • እንዴት?
  • ስማ በተደጋጋሚ ቢሮ የምትገባው እየጣጠህ ነው፡፡
  • ወድጄ አይደለም እኮ ክቡር ሚኒስትር፡፡
  • የቢሮ ዲሲፕሊን አታውቅም እንዴ?
  • ሱስ ስላለብኝ እኮ ነው ክቡር ሚኒስትር፡፡
  • ከመጠጥ ሱስህ ባለፈ ሌሎችም ሱሶች አሉብህ አይደል?
  • ጫትም እቅማለሁ፡፡
  • የሚገርመው በሥራ ሰዓት ከቢሮ እየወጣህ ጫት ቤት ነው የምትውለው፡፡
  • ክቡር ሚኒስትር ጫት ቤት ብሄድም ሥራዬን እዚያም ሆኜ እሠራለሁ፡፡
  • ጫት ቤት ሆነህ እንዴት ነው እዚህ ያለውን ሥራ የምትሠራው?
  • ክቡር ሚኒስትር ፋይሎቹን ጫት ቤት ይዤ ሄጄ ከዚያ ሥራዬን እሠራ ነበር፡፡
  • ይህ በጣም አሳፋሪ ነው፡፡
  • ይቅርታ ክቡር ሚኒስትር፡፡
  • በዚያ ላይ ቢሮ ውስጥ ከበርካታ ሰዎች ጋር ትጣላለህ፡፡
  • እኔ እኮ ትንሽ ከነኩኝ ስለምናደድ ነው፡፡
  • በዚህ ፀባይህ የተለያዩ ሰዎች ላይ የአካል ጉዳት አድርሰሃል፡፡
  • ምን ላድርግ በተፈጥሮዬ ቁጡ ስለሆንኩ ነው፡፡
  • ስለዚህ አንተን ወደዚህ መሥሪያ ቤት የምትመለስበት ምክንያት አላገኘሁም፡፡
  • ኧረ ጥሩ ምክንያት አለ ክቡር ሚኒስትር፡፡
  • ምንድነው እሱ?
  • ዘመኑ እኮ የፍቅርና የመደመር ነው፡፡
  • ቢሆንም ከአንተ ዓይነቱ ሥርዓተ አልበኛ ጋር ፍቅርና መደመር አይሠራም፡፡
  • ክቡር ሚኒስትር ሌላ ምክንያትም አለኝ፡፡
  • ምንድነው?
  • ከሥራ በታገድኩበት ወቅት ስለመሥሪያ ቤታችን ዋነኛ ተቆርቋሪ ነበርኩ፡፡
  • ነገርኩህ እኮ እንደ አንተ ዓይነቱ ሥርዓተ አልበኛ መሥሪያ ቤታችን እንዲኖር አልፈልግም፡፡
  • ምን እያሉኝ ነው ታዲያ?
  • እኔም ከሥራህ እንድትታገድ ወስኛለሁ፡፡
  • ችግር የለውም ክቡር ሚኒስትር፡፡
  • ስለዚህ በስምህ ያሉትን ንብረቶች በአስቸኳይ አስረክብ፡፡
  • ለስቴፕለርና ለወረቀት ደግሞ ምን ችግር አለው?
  • ላፕቶፕም በስምህ እንዳለ አይቻለሁ፡፡
  • ስለእሱም አይጨነቁ አስረክባለሁ፡፡
  • ሌላም በስምህ የተመዘገበ ዕቃ አይቻለሁ፡፡
  • ምንድነው እሱ?
  • ማከሮቭ ሽጉጥ፡፡
  • ምን እያሉ ነው ክቡር ሚኒስትር?
  • እሱንም ሽጉጥ አስረክብ፡፡
  • እየቀለዱ ነው ክቡር ሚኒስትር?
  • የምን ቀልድ ነው?
  • ለዚህ ጥያቄዎ ምላሼ አንድ ነው፡፡
  • ምንድነው?
  • ትጥቅ አልፈታም!

[ክቡር ሚኒስትሩ ጸሐፊያቸውን ቢሮ አስጠሯት]

  • አቤት ክቡር ሚኒስትር፡፡
  • አለቃችን መቼም በአገሪቱ እያደረጉ ያለውን ሪፎርም አይተሻል?
  • የቱን ክቡር ሚኒስትር?
  • ሴቶችን ወደ ሥልጣን በማምጣት ያደረጉትን ለውጥ ነዋ፡፡
  • በጣም ነው የተደሰትኩት ክቡር ሚኒስትር፡፡
  • እኔም የእሳቸውን ፈለግ በመከተል በመሥሪያ ቤታችን የሴቶችን ተሳትፎ ለማሳደግ ፈልጌያለሁ፡፡
  • ደስ ይላል ክቡር ሚኒስትር፡፡
  • እኛ መሥሪያ ቤት የበር ጥበቃ ስትመለከቺ ወንድ ብቻ ነው፡፡ በየቢሮው ብትገቢ ወንድ ነው፡፡ ሾፌሬ ወንድ፣ ጋርዶቼ ወንድ፣ አማካሪዎቼ ወንድ፣ ብቻ ምን አለፋሽ ሁሉ ቦታ ወንድ ብቻ ነው ያለው፡፡
  • እ. . .
  • ታዲያ ሴቶቹ የት አሉ?
  • እኔን አንድ ብለው መጀመር ይችላሉ፡፡
  • ምን መሰለሽ ከአንቺ ውጪ ቡና የምታቀርብልኝ ልጅ ብቻ ነው የማየው፡፡
  • ክቡር ሚኒስትር ምናልባት እርስዎ ስለሚያውቋቸው ይሆናል እንጂ ሌሎችም ሴቶች አሉ፡፡
  • ስሚ ለእኔ አሁን የማንቂያ ደወል ነው የተደወለልኝ፡፡
  • የምን ደወል?
  • የአገራችን ፕሬዚዳንት እንዲሁም የካቢኔያችን ግማሽ ሴቶች መሆናቸው በጣም ጥሩ የማንቂያ ደወል ነው፡፡
  • ምን ሊያደርጉ ነው ታዲያ ክቡር ሚኒስትር?
  • ስለዚህ የእኛም መሥሪያ ቤት የኃላፊነት ቦታዎች በሙሉ በሴቶች መያዝ አለባቸው፡፡
  • የኃላፊነት ቦታ ግን አቅም ባለው ሰው እንጂ በፆታ መሆን አለበት ብለው ያምናሉ?
  • ምን ነካሽ ከዚህ በፊት ሹመት በታማኝነት እንጂ በብቃት መቼ ሆኖ ያውቃል?
  • እ. . .
  • ስለዚህ አሁን ደግሞ ለለውጥ ያህል በፆታ ብናደርገው ምን ችግር አለው?
  • ማለቴ የኃላፊነት ቦታ ብዙ ውሳኔዎች ስለሚሰጥበት ብቃት የግዴታ ነው ብዬ ነዋ?
  • ስሚ የእኔ ዋና ዓላማ ታሪክ መሥራት እንጂ ሌላው አያሳስበኝም፡፡
  • ምን?
  • ስለዚህ ጋርዶቼ በሙሉ ሴቶች ይደረጉልኝ፡፡
  • እንዴት ይሆናል ክቡር ሚኒስትር?
  • ምን ችግር አለው? የጋዳፊ ጋርዶች ሴቶች አልነበሩ? ስለዚህ የእኔም ስም ከእሱ ጋር በታሪክ እየተነሳሁ ከታወስኩ ምን እፈልጋለሁ?
  • ካሉ ምን ይደረጋል?
  • እሱ ብቻ ሳይሆን ሾፌሬም ሴት ትሁንልኝ፡፡
  • እ. . .
  • ነገርኩሽ እኮ ዓላማዬ ታሪክ መሥራት ነው፡፡
  • የሚያዋጣ ግን አልመሰለኝም፡፡
  • ስሚ ቢቻልማ እኔም ብቀይር ደስ ይለኛል፡፡
  • ምንድነው የሚቀይሩት?
  • ፆታዬን!

[ክቡር ሚኒስትሩ ከሌላ ሚኒስትር ጋር በስልክ እያወሩ ነው]

  • ክቡር ሚኒስትር ምንድነው የምሰማው?
  • ምን ሰማህ?
  • ተው እንጂ ክቡር ሚኒስትር ከቁጥጥር ውጪ እየሆኑ እኮ ነው?
  • ምንድነው የምታወራው?
  • የእርስዎ ግን በዛ፣ እኔ ራሴ ማፈር ጀመርኩ፡፡
  • ምኑ ነው ያሳፈረህ?
  • በየቦታው የሌብነትና የሙስና ችግር ካለ የእርስዎ ስም እኮ ነው የሚነሳው፡፡
  • ስማ ሪፎርሙን የማይቀበሉ አካላትን ወሬ ዝም ብለህ ማስተጋባት የለብህም፡፡
  • እንዴት?
  • ከማንም በፊት መደመሬን ታውቃለህ?
  • እሱማ ልክ ነው፡፡
  • አየህ በፊት እነሱ ሲሰርቁ ዝም በማለቴ አሁን ያጋልጠናል ብለው ስለሚፈሩ ነው እንደዚህ ስሜን የሚያጠፉት፡፡
  • አልመሰለኝም ክቡር ሚኒስትር፡፡
  • ለመሆኑ ምን ሰምተህ ነው?
  • ከተማ ውስጥ ስም አልባ ከሆኑት ሕንፃዎች መካከል ሁለቱ የእርስዎ ናቸው ይባላል፡፡
  • ለእዚህ ነው እኮ እያሳሳቱህ ነው ያልኩህ?
  • እንዴት ክቡር ሚኒስትር?
  • እኔ ከእነሱ ውስጥ አራት ነው ያሉኝ፡፡
  • ይኼን ነበር የፈራሁት፡፡
  • ምን ነካህ አገሪቱ በ11 በመቶ እያደገች እኛ ካላደግን ምን ትርጉም አለው?
  • ለማንኛውም አካሄድዎ ትክክል አይመስለኝም ክቡር ሚኒስትር፡፡
  • አካሄዴማ ትክክል ለመሆኑ አትጠራጠር፡፡
  • ብቻ የእኔ ፀሎት አንድ ነው፡፡
  • ምንድነው?
  • አወዳደቅዎትን. . .
  • እ. . .
  • ያሳምርልዎት!