Skip to main content
x
ክቡር ሚኒስትሩ ለአንድ ዲፕሎማት ስልክ ይደውላሉ

ክቡር ሚኒስትሩ ለአንድ ዲፕሎማት ስልክ ይደውላሉ

  • ሰላም ክቡር ሚኒስትር፡፡
  • ሰላም ወዳጄ፡፡
  • ጠፍተዋል ክቡር ሚኒስትር፡፡
  • ያው የእኛን ሥራ እያወቅከው?
  • እሱማ አሁን የባሰ ሥራ እንደሚበዛብዎት አውቃለሁ፡፡
  • ይኸው ለውጡን ለማሳለጥ ከፍ ዝቅ እያልን ነው፡፡
  • ክቡር ሚኒስትር በእርግጥ ስለለውጡ እኛም ከጎናችሁ ነን፡፡
  • ምን ነካህ ለውጡ ያለእናንተ ድጋፍ የትም አይደርስም፡፡
  • ስለእሱማ አያስቡ፣ ሁሌም ከጎናችሁ ነን፡፡
  • እሱንማ እኛም እናውቃለን፡፡
  • ለመሆኑ ለውጡ እንዴት እየሄደ ነው?
  • እንደምታየው አገሪቱን ዴሞክራሲያዊ ለማድረግ ደፋ ቀና እያልን ነው፡፡
  • በእርግጥ እያደረጋችሁት ያለው ለውጥ አበረታች ነው፡፡
  • አዲሱን የሚኒስትሮች ሹመት መቼም በሚገባ ተከታትለኸዋል፡፡
  • እያንዳንዱን ነገር ነው የምከታተለው፡፡
  • ታዲያ እንዴት አገኘኸው?
  • በእውነት ሴቶችን ወደ ሥልጣን ለማምጣት ያላችሁን ቆራጥነት አድንቄዋለሁ፡፡
  • ስማ ገና ከዚህ በላይ ትገረማለህ፡፡
  • በምን?
  • ከዚህም በላይ ሴቶችን ወደ ሥልጣን ለማምጣት ወሰነናል፡፡
  • እሱማ የአገሪቱን ፕሬዚዳንትም ሴት ማድረጋችሁ የቆራጥነታችሁ ማሳያ ነው፡፡
  • ብንችልማ ሙሉ ለሙሉ የመንግሥትን ሥልጣን ለሴቶቹ ሰጥተን ብንገላገል ይሻለናል፡፡
  • ከዚያ ከሚኒስትርነት ወደ ወንዶች መብት ተሟጋችነት ይቀየራሉዋ?
  • መቼም ቀልደኛ ነህ፡፡
  • ክቡር ሚኒስትር ለውጡ ግን በሌላ በኩል እያሳሰበኝ ነው፡፡
  • ምኑ ነው ያሳሰበህ?
  • በቃ ሥርዓተ አልበኝነት በየቦታው ነው የሚታየው፡፡
  • ያው አለቃችን እንዳሉት ታፍኖ የነበረ ሰው ሲለቀቅ ብዙ ችግር መፍጠሩ አይቀሬ ነው፡፡
  • አይ ቢሆንም ክቡር ሚኒስትር አንዳንድ ቦታዎች የምናያቸው ሁኔታዎች በአስቸኳይ መፍትሔ ካልተሰጣቸው አሳሳቢ ይመስሉኛል፡፡
  • እሱስ ልክ ነህ፡፡
  • ዛሬ ታዲያ ከየት ተገኙ?
  • አንድ ነገር ላማክርህ ብዬ ነው፡፡
  • ምንድነው ክቡር ሚኒስትር?
  • አንድ ጓደኛዬ በጡረታ አገለልነውና እናንተ ጋ ልከነው ነበር፡፡
  • በጣም ጥሩ፡፡
  • ያው የኃላፊነቱን ቦታ በወጣቶች እየተካነው ስለሆነ እሱ እናንተ ጋ ቢመጣ ይሻላል ብለን ነው የላክነው፡፡
  • ታዲያ ምን ልርዳዎት?
  • እናንተ ግን አንቀበለውም ብላችሁታል፡፡
  • እ. . . ክቡር ሚኒስትር ለአምባሳደርነቱ የላካችሁትን ግለሰብ ነው?
  • አዎን ወዳጄ፡፡
  • ያው እንደሚያውቁት ክቡር ሚኒስትር፣ ሁሌም አምባሳደሮች ሲሾሙ በራሳችን የማጣራት ሥራ እናከናውናለን፡፡
  • ታዲያ ምን አግኝታችሁበት ነው?
  • ከፍተኛ የሆነ የማስፈጸም ችግር እንዳበት ተረድተናል፡፡
  • እዚህ ጋ እንዳትሳሳት፡፡
  • እንዴት ክቡር ሚኒስትር?
  • ሰውዬ እንዲያውም ከፍተኛ የሆነ የማስፈጸም ብቃት ነው ያለው፡፡
  • አልገባኝም ክቡር ሚኒስትር?
  • እንደምታውቀው እኛ እንደ አገር የመካከለኛ ገቢ ካላቸው አገሮች ተርታ ለመሠለፍ እየሠራን ነው፡፡
  • እሱንማ አውቃለሁ፡፡
  • ሰውዬው ከአገራችን በፊት በግሉ ከእነሱ አገሮች ተርታ መሠለፍ ችሏል፡፡
  • እ. . .
  • እሱ ብቻ ሳይሆን ብዙዎችን ከድህነት ወለል በታች አንስቶ እሱ የደረሰበት ደረጃ አድርሷል፡፡
  • ምን ይቀልዳሉ?
  • ብቻ ምን አለፋህ አገሪቱ 11 በመቶ እንድታድግ ከፍተኛ ሚና ሲጫወት የነበረው እሱ ነው፡፡
  • እና ምን እያሉ ነው?
  • እኛም እናንተ ጋ የመደብነው እናንተም ከእኛ ተምራችሁ እንደ እኛ የምታድጉበትን መንገድ ያሳያችኋል ብለን ነው፡፡
  • አሁን አረጋገጡልኝ ክቡር ሚኒስትር፡፡
  • ምኑን?
  • የወሰነው ውሳኔ ትክክል መሆኑን፡፡
  • ምን ነካህ ወዳጄ ከእሱ እኮ ብዙ ትማራላችሁ እያልኩህ ነው?
  • ከእሱ የምንማረው አንድ ነገር ብቻ ነው፡፡
  • ምንድነው?
  • ሌብነት!

[ክቡር ሚኒስትሩ ከጸሐፊያቸው ጋር እያወሩ ነው]

  • ምነው የከፋሽ ትመስያለሽ?
  • መቼም የእኔን ሥራ ከእርስዎ የበለጠ የሚረዳው የለም፡፡
  • አልገባኝም?
  • ያው በሥራዬ ላይ ምንም ዓይነት ግድፈትና ችግር ታይቶብኝ አይታወቅም፡፡
  • እሱስ ጥሩ ሰው ነሽ፡፡
  • እኔ አንድም ቀን ደከመኝ ሰለቸኝ ሳልል የእርስዎን የራስ ምታት ለማቅለል ሁሌም ተግቼ ነው የምሠራው፡፡
  • ይኼንን ሁሉ ለምንድነው የምትነግሪኝ?
  • ክቡር ሚኒስትር ሥራዬ ተገቢውን ትኩረት እያገኘ አይደለም፡፡
  • ሰርተፊኬት ፈልገሽ ነው?
  • ይኼማ በሰርተፊኬት የሚታለፍ አይደለም፡፡
  • ታዲያ ደመወዝ ጭማሪ ነው?
  • ደመወዝ ጭማሪም አይደለም፡፡
  • የደረጃ ዕድገት ነው የፈለግሽው?
  • የተግባባን አልመሰለኝም ክቡር ሚኒስትር?
  • ምን እያልሽ ነው ታዲያ?
  • አሁን በአገሪቱ እየመጣ ያለው ለውጥ እንዴት እንደመጣ ያውቃሉ?
  • በዋናነት ሕዝቦች ጭቆና በቃኝ ስላሉ ነዋ፡፡
  • እንዳይመስልዎት ክቡር ሚኒስትር፡፡
  • ታዲያ በምንድነው የመጣው?
  • እኔ ቢያንስ ቢያንስ በሳምንት ሁለቴ ቤተ ክርስቲያን ሄጄ ለእመብርሃን ሻማ አበራ ነበር፡፡
  • እሺ፡፡
  • ይኼው እሷም ፀሎቴን ሰምታ ግማሹን ካቢኔ ሴት አድርጋዋለች፡፡
  • እ. . .
  • ምን እሱ ብቻ ክቡር ሚኒስትር? ፕሬዚዳንት ሴት፣ ጠቅላይ ፍርድ ቤት ፕሬዚዳንት ሴት ናቸው የተሾሙት፡፡
  • የለውጡ ዋና ተጠያቂ እመብርሃን ናት እያልሺኝ ነው?
  • እንደዚያ ሳይሆን የለውጡ ውጤት ያስደስታል እያልኩዎት ነው፡፡
  • ስለዚህ ምን ይደረግ?
  • እኔም የዚህ ለውጥ አካል መሆን አለብኝ ብዬ አምናለሁ፡፡
  • ለመሆኑ አንቺ ትምህርትሽ ምንድነው?
  • እንደሚያውቁት ከአዲስ አበባ ዩኒቨርሲቲ በሕግ ዲግሪ አለኝ፡፡ ማስተርሴንም ጀምሬ ኃላፊነት ስለበዛብኝ ነው ያቋረጥኩት፡፡
  • ታዲያ ዲግሪ ይዘሽ ነው የምትንጫጪው?
  • መቼም ከእርስዎ የፌክ የተልዕኮ ዲግሪ ይሻላል፡፡
  • ምንድነው ያልሽው?
  • ሰምተዋል ክቡር ሚኒስትር፡፡
  • እ . . .  
  • ክቡር ሚኒስትር እኔ ልምዱም አለኝ፣ ብቃቱም አለኝ፣ ከእርስዎ የምፈልገው ሪኮመንድ እንዲያደርጉልኝ ነው፡፡
  • ለምንነት?
  • ለሚኒስትርነት!

[ክቡር ሚኒስትሩ ከሌላ ሚኒስትር ጋር እያወሩ ነው]

  • ክቡር ሚኒስትር ምንድነው?
  • ምነው ወዳጄ?
  • በየሄድኩበት የእርስዎ ስም እኮ በጥሩ አይነሳም፡፡
  • አልገባኝም?
  • የመንግሥት ችግር በተወራ ቁጥር የእርስዎ ስም ሳይነሳ አይቀርም፡፡
  • ስማ ተረቱን አታውቀውም እንዴ?
  • የምን ተረት?
  • ውሾቹም ጩኸታቸውን ይቀጥሉ፣ ግመሎቹም ጉዟቸውን አያቋርጡም፡፡
  • ክቡር ሚኒስትር ይኼ በቀላሉ የሚታለፍ አይደለም፡፡
  • ምን እያልከኝ ነው?
  • ለምንድነው ሁሌ ከብልሹ አሠራር ጋር ስምዎ የሚነሳው?
  • የምን ብልሹ አሠራር ነው?
  • ይኼው መሥሪያ ቤትዎ በዘርና በወንዝ ብቻ ነው ሥራ የሚሠራው፡፡
  • ምንድነው የምትለው?
  • ሰዎች እርስዎ ጋ የሚገቡት በዘር ካልሆነ በስተቀር በብቃታቸው አይደለም፡፡
  • እኔ ስማ ከምንም ነገር በላይ ለብቃት ነው ቦታ የምሰጠው፡፡
  • ክቡር ሚኒስትር እውነታው ግን መሥሪያ ቤትዎት በዘርና በወንዝ ተጠላልፎ ሥራ መሥራት አልተቻለም፡፡
  • ይኼ የምቀኛ ወሬ ነው ስልህ?
  • በዚያ ላይ ከፍተኛ የሆነ የሀብት ብክነት ነው ያለው፡፡
  • እ. . .
  • ክቡር ሚኒስትር የሕዝብና የመንግሥትን ሀብት እንደ ውርስ ንብረት ነው የሚያዙበት ይባላል፡፡
  • መቼም የሚሠራ ሰው ላይ እኮ ወሬ በዛበታል?
  • ክቡር ሚኒስትር በዚህ ጉዳይ እንኳን አፍ ያለዎት አይመስለኝም፡፡
  • እንዴት?
  • ያው ዘመኑ የይቅርታና የፍቅር ነው ተብሎ እንጂ እርስዎ የሚገባዎት ምን እንደሆነ ያውቃሉ?
  • ምንድነው የሚገባኝ?
  • ጓንታናሞ ነዋ፡፡
  • አንተ ደግሞ ታበዛዋለህ?
  • ክቡር ሚኒስትር እርስዎ እኮ የሙሰኞች አባት ነው የሚባሉት፡፡
  • ምን? አሁን ያልሰረቀ ማን አለ ብለህ ነው?
  • የእርስዎ ግን ከአቅም በላይ ነው፡፡
  • ያው እኔ ነገር ስለሚገንብኝ ነው፡፡
  • በዚያ ላይ ደግሞ ከፍተኛ የሆነ የአፈጻጸም ማነስ ችግር አለብዎት፡፡
  • የተሰጠኝን ሥራ ሁሉ አይደል እንዴ የምፈጽመው?
  • ክቡር ሚኒስትር ዝቅተኛ የሥራ አፈጻጸም ያለው እኮ በእርስዎ መሥሪያ ቤት ነው፡፡
  • ምን ላድርግ ታዲያ?
  • እኔማ ልከራከርልዎት ሞክሬ ነበር፣ ግን አሁን ሁሉም ደርሶበታል፡፡
  • ምኑን?
  • ችግርዎን ነዋ፡፡
  • ምንድነው ችግሬ?
  • የአቅም ማነስ!

[ክቡር ሚኒስትሩ እየተገመገሙ ነው]

  • ክቡር ሚኒስትር እንደ እርስዎ በጣም ወጥ የረገጠ ሰው የለም፡፡
  • ኧረ እኔ ስኳርና ደም ግፊት ስላለብኝ ወጥ የሚባል ነገር በልቼ አላውቅም፡፡
  • ስለማይበሉት እኮ ነው የሚረግጡት፡፡
  • በቃ ግምገማ በጠራችሁኝ ቁጥር ጤንነቴ ይታወካል እኮ?
  • የሚያሳምምዎት ግምገማ መጠራትዎ ሳይሆን ሥራዎ ነው፡፡
  • እሺ ምንድነው? መቼም በልተሃል ምናምን ልትሉኝ እንዳይሆን?
  • እህሳ ክቡር ሚኒስትር፡፡
  • አሁን እዚህ ውስጥ ያልበላ ሰው አለ?
  • ያልተጠየቁትን አይቀባጥሩ ክቡር ሚኒስትር፡፡
  • አበላልህ ለየት ያለ ስለሆነ ልምድ አካፍለን ብላችሁ ከሆነ በደስታ ነው የማካፍላችሁ፡፡
  • የተጠሩት ሊገመገሙ ነው፡፡
  • ማን ገምጋሚ? ማን ተገምጋሚ ሊሆን ነው?
  • ክቡር ሚኒስትር የተጠሩት ሊገመገሙ ነው፡፡
  • እኮ በምንድነው የምገመገመው?
  • ለምሳሌ የማስፈጸም አቅምዎ እጅግ ዝቅተኛ ነው፡፡
  • አውቃለሁ፡፡
  • በዚህ ያመጡት ምን እንደሆነ ያውቃሉ?
  • ምን አመጣሁ?
  • F
  • ሌላው የሚገመገሙት በሀብት ብክነት ነው፡፡
  • እሺ፡፡
  • በዚህ ምን እንዳመጡ ያውቃሉ?
  • ቆይ ልገምት፡፡
  • እሺ፡፡
  • F?
  • በትክክል፡፡
  • እሺ ቀጥሉ፡፡
  • በመልካም አስተዳደርም ተመሳሳይ ነው ያመጡት፡፡
  • በሁሉም ዘርፍ Flag አውለብልበሃል እያላችሁኝ ነው?
  • ክቡር ሚኒስትር ወዳልተፈለገ የባንዲራ ፖለቲካ ባይገቡ ጥሩ ነው፡፡
  • እሺ ቀጥሉ፡፡
  • በአጠቃላይ የሥራ አፈጻጸም ብቃትዎ ሲገመገም የሚገልጽዎ አንድ ነገር ብቻ ነው፡፡
  • ምንድነው?
  • Failure!