Skip to main content
x
ሐበሻ ዊክሊ የገና እና የፋሲካ በዓላትን የንግድ ርዕይ በ65 ሚሊዮን ብር ወጪ እንደሚያሰናዳ አስታወቀ
የሐበሻ ዊክሊ ኃለፊዎች በ65 ሚሊዮን ብር ወጪ ስለሚሰናዱት ሁለት የንግድ ርዕዮች መግለጫ በሰጡበት ወቅት

ሐበሻ ዊክሊ የገና እና የፋሲካ በዓላትን የንግድ ርዕይ በ65 ሚሊዮን ብር ወጪ እንደሚያሰናዳ አስታወቀ

የንግድ ዓውደ ርዕዮችንና የመዝናኛ ዝግጅቶችን በማሰናዳት የሚታወቀው ሐበሻ ዊክሊ ፕሮሞሽን 65 ሚሊዮን ብር ወጪ የጠየቁ ሁለት የበዓል ንግድ ርዕዮችን ለየት ባለ መንገድ እንደሚያዘጋጅ አስታውቋል፡፡ ‹‹ሐበሻ የገና ኤክስፖ›› የተሰኘና ለ23 ቀናት የሚቆይ የ2011 የገናና የፋሲካ የንግድ ዓውደ ርዕዮች ማሰናዳቱን የኩባንያው ኃላፊዎች ገልጸዋል፡፡

የአዲስ አበባ ኤግዚቢሽን ማዕከል የንግድ ዓውደ ርዕይ ለሚያዘጋጁ ኩባንያዎች ባወጣው ጨረታ ላይ ተሳትፎ የሁለቱን በዓላት የንግድ ርዕይ ለማሰናዳት ሐበሻ ዊክሊ አሸናፊ የሆነበት ዋጋ ከ47 ሚሊዮን ብር በላይ እንደሆነ ታውቋል፡፡ የኩባንያው ዋና ሥራ አስፈጻሚ ዳይሬክተር አቶ አዶኒክ ወርቁ እንደገለጹት፣ ለዝግጅቱ የጨረታ ክፍያና ለገና ኤክስፖ ዝግጅት 26 ሚሊዮን ብር፣ ለፋሲካ ኤክስፖ ዝግጅት ኩባንያው በጨረታ ያሸነፈበት ዋጋ 21 ሚሊዮን ብር ነው፡፡ በአጠቃላይ ለሁለቱ ዓውደ ርዕዮች የጨረታ ክፍያና ለዝግጅት የሚውሉት ወጪዎች ታክለውበት ከ65 ሚሊዮን ብር በላይ ወጪ የሚጠይቅ ዝግጅት እንደሚካሄድ ተጠቅሷል፡፡

 ሁለቱ የንግድ ትርዒቶች ከሚጠይቁት ወጪ አንፃር የዘንድሮው ከፍተኛው እንደሆነም ተጠቅሷል፡፡ በንግድ ርዕዩ እስከ 500 የአገር ውስጥና የውጭ ኩባንያዎች እንደሚሳተፉ ሲጠበቅ፣ በርካታ የንግድ ልውውጦችና የንግድ ትስስሮች የሚከናወኑበት መድረክ እንደሚሆንም አቶ አዶኒክ ገልጸዋል፡፡ እስካሁን ባለው መረጃ በዝግጅቱ ከሚሳተፉ ኩባንያዎች ከ90 በመቶ በላይ መመዝገባቸው ታውቋል፡፡ ከግማሽ ሚሊዮን የሚልቁ ጎብኚዎች ይታደሙባቸዋል ተብለው የሚጠበቁት የንግድ ትርዒቶቹ፣ የኢትዮጵያ ትልቁ የንግድ ዓውደ ርዕይ ሊያሰኛቸው የሚችላቸው ገጽታዎችም እንደሏቸው ተገልጿል፡፡ ኤክስፖዎቹ ምርትና አገልግሎት መዝናኛና ሌሎችም ዘውጎች፣ አዳዲስ ፈጠራዎችና ትዕይንቶች ተጣምረው እንደሚቀርቡባቸው ይጠበቃል፡፡

ዝግጅቱ ከንግድ ትርዒትና ከበዓል ወቅት ሸመታ መድረክነት ባሻገር በጎ ተግባራትንም ያካተተ ክንውን እንዳለው ተጠቅሷል፡፡ ለተለያዩ የበጎ አድራጎት ድርጅቶች ግምቱ 800 ሺሕ ብር የሚያወጣ ቦታ በሁሉም የዝግጀቱ ጊዜያት በመስጠት ኩባንያው ማኅበራዊ ኃላፊነቱን ለመወጣት ማቀዱ አንዱ ነው፡፡ ለሸማቾች ማኅበራትና ዩኒየኖች ለጥቃቅንና አነስተኛ ኢንተርፕራይዞች በግማሽ ዋጋ ቦታ በማዘጋጀት እንዲሳተፉ ማድረግም ከታሰቡት ውስጥ ይካተታል፡፡

እስካሁን በኤግዚቢሽን ማዕከል ያልተለመዱ ግን ዝግጅቶቹን ለማድመቅ የሚውሉ አዳዲስ ትዕይቶችም ይካተታሉ ተብሏል፡፡ በሐበሻ  ገና ኤክስፖ ላይ የሚሳተፉ ኩባንያዎች ምርቶቻቸውን በማምረቻ ዋጋ እንደሚያቀርቡ የተገለጸ ሲሆን፣ ለኤግዚቢሽኑ የተለያየ ፍጆታ ዕቃዎች የሚቀርቡበትም ነው፡፡