Skip to main content
x
በጂቡቲ የተሰናዳው የንግድ ርዕይ የኢትዮ ጂቡቲ ትብብር የሚዘክርበትን ሥነ ሥርዓት አካቷል

በጂቡቲ የተሰናዳው የንግድ ርዕይ የኢትዮ ጂቡቲ ትብብር የሚዘክርበትን ሥነ ሥርዓት አካቷል

በጂቡቲ መካሄድ በጀመረው ሁለተኛው ዓለም አቀፍ የንግድ ትርዒት ላይ አሥር የኢትዮጵያ ኩባንያዎች የተሳተፉ ሲሆን፣ ረቡዕ ኅዳር 26 ቀን 2011 ዓ.ም. የሁለቱን አገሮች ግንኙነት የሚዘክር ‹‹የኢትዮ ጂቡቲ ወዳጅነት ቀን›› የተሰኘው ሥነ ሥርዓት እንደሚከናወን ታውቋል፡፡

ከተለያዩ አገሮች የተውጣጡ ከ310 በላይ ኩባንያዎች የተሳተፉበት ዓለም አቀፉ የንግድ ዓውደ ርዕይ መካሄድ ከጀመረ ሦስተኛ ቀኑን የያዘ ሲሆን፣ የኢትዮጵያ የመካከለኛ ኢንዱስትሪ አምራቾችና በውጭ ንግድ ላይ ያተኮሩ ኩባንያዎችም ምርታቸውን በማስተዋወቅ ላይ ይገኛሉ፡፡

የንግድ ርዕዩን የከፈቱት የጂቡቲው ፕሬዚዳንት እስማኤልን ኦማር ጊሌ፣ አገራቸው ለሁሉም ኢንቨስተሮች ክፍት መሆኗን ለማሳየትና አልሚዎችን ለማበረታታት ጭምር የንግድ ትርኢቱ መዘጋጀቱን አስታውቀዋል፡፡

ዝግጅቱን ያሰናዳው የጂቡቲ ንግድ ምክር ቤት ፕሬዚዳንት የሱፍ ሙሳ ደዋል ባሰሙት የመክፈቻ ንግግር፣ የዘንድሮው የንግድ ርዕይ ኢትዮጵያን ጨምሮ ከአምስት አኅጉራት የተውጣጡ ተሳታፊዎች በጂቡቲና በተቀረውም የአፍሪካ ቀንድ ቀጣና የንግድና ኢኮኖሚ እንቅስቀሴ ላይ አስተዋጽኦ እንደሚያደርግ እምነታቸውን ገልጸዋል፡፡

በጂቡቲ የተሰናዳው የንግድ ርዕይ የኢትዮ ጂቡቲ ትብብር የሚዘክርበትን ሥነ ሥርዓት አካቷል

 

በዝግጅቱም ዋና ዋና ተሳታፊዎች ከሆኑት ውስጥ የጃፓን፣ የጣሊያን፣ የኢትዮጵያና የቻይና ኩባንያዎች አብላጫውን ቁጥር እንደያዙ የምክር ቤቱ ፕሬዚዳንት ገልጸዋል፡፡

ኢትዮጵያና ጂቡቲ ጠንካራ የኢኮኖሚ ትስስር ያላቸው አገሮች ከመሆናቸው አንፃር፣ በዘንድሮው የንግድ ርዕይ ላይ የኢትዮጵያውኑ ተሳትፎ እንደሚጠበቀው  ባይሆንም በመጪው ዓመት ግን በርካታ ኩባንያዎችን ለመሳብ ዕቅድ እንደተያዘ ለጋዜጠኞች በሰጡት መግለጫ ጠቅሰዋል፡፡

ንግድ ምክር ቤቱ ከኢትዮጵያ አቻው ጋር በቅርበት እየሠራ በመሆኑ፣ በመጪው ዓመት ከንግድ ርዕይ ባሻገር በኢንቨስትመንቱም የበለጠ ለመሥራት እንደተዘጋጀ  አመልክተዋል፡፡ በተለይም የኢትዮጵያን ባለሀብቶች በጂቡቲ የኢንቨስትመንት ተሳትፎ ላይ ያላቸውን ድርሻ ለማሻሻል ጥረት እየተደረገ ስለመሆኑም አስታውቀዋል፡፡

 የጂቡቲ መንግሥት በቅርቡ ባስመረቀው የኢንዱስትሪና የማምረቻ ቀጣና ለኢትዮጵያና ለሌሎች አገሮች ኩባንያዎች ከትርፋቸው ምንም ዓይነት ታክስ የማይከፍሉበት የንግድ ቀጣና መዘጋጀቱን ሚስተር ሙሳ ደዋል አስታውቀዋል፡፡

ከንግድ ርዕዩ ጋር በተያያዘ ዝግጅቱ መካሄድ በጀመረ ሦስተኛው ቀን ማለትም  ኅዳር 26 ቀን 2011 ዓ.ም. የኢትዮጵያና የጂቡቲ ቀን ሆኖ እንደሚከበር መወሰኑን አዘጋጆቹ ገልጸዋል፡፡ ዝግጅቱንም የኢትዮጵያ ኤምባሲ ከጂቡቲ ንግድ ምክር ቤት ጋር ተባብረው እንዳዘጋጁት ተጠቅሷል፡፡ የኢትዮጵያ ባህል፣ ታሪክ፣ ባህላዊ ምግቦችና  ሌሎችም የኢትዮጵያ ትውፊቶች ለጎብኚዎችና ለተጠሩ እንግዶች እንደሚቀርብ አዘጋጆቹ ገልጸዋል፡፡