Skip to main content
x
የሜቴክ ከፍተኛ ኃላፊዎች በመንግሥት ላይ ከ319 ሚሊዮን ብር በላይ ጉዳት በማድረስ ተጠርጥረው ክስ ተመሠረተባቸው
ሜጄር ጄኔራል ክንፈ ዳኘው

የሜቴክ ከፍተኛ ኃላፊዎች በመንግሥት ላይ ከ319 ሚሊዮን ብር በላይ ጉዳት በማድረስ ተጠርጥረው ክስ ተመሠረተባቸው

የብረታ ብረት ኢንጂነሪንግ ኮርፖሬሽን (ሜቴክ) ከፍተኛ ኃላፊዎች በመንግሥት ላይ  319,475,287 ብር ጉዳት በማድረስ ተጠርጥረው በፌዴራል ከፍተኛ ፍርድ ቤት 15ኛ ወንጀል ችሎት ክስ ተመሠረተባቸው፡፡

በክሱ የተካተቱት የሜቴክ የቀድሞ ዋና ዳይሬክተር ሜጄር ጄኔራል ክንፈ ዳኘው፣ የሜቴክ የቀድሞ ምክትል ዋና ዳይሬክተርና የግብይትና ሽያጭ ኃላፊ ብርጋዴር ጄኔራል ጠና ቁርንዲ፣ የአዳማ እርሻ መሣሪያዎች ኢንጂነሪንግ ኢንዱስትሪ የቀድሞ ዋና ሥራ አስኪያጅ ኮሎኔል ደሴ ዘለቀ፣ የአዳማ እርሻ መሣሪያዎች ኢንጂነሪንግ ኢንዱስትሪ የቀድሞ ምክትል ዋና ዳይሬክተርና የኮርፖሬሽኑ ማርኬቲንግና ሰፕላይ ኃላፊ ኮሎኔል ጌትነት ጉድያ፣ የአዳማ እርሻ መሣሪያዎች ኢንጂነሪንግ ኢንዱስትሪ የቀድሞ ምክትል ዋና ዳይሬክተርና የኮርፖሬት ኒው ቢዝነስ ዋና ሥራ አስኪያጅ ኮሎኔል ጎይቶም ከበደ፣ በንግድ ሥራ የሚተዳደሩት ቸርነት ዳና፣ እሌኒ ብርሃኑና ረመዳን ሙሳ ናቸው፡፡

ተከሳሾቹ የተጠቀሰውን ገንዘብ በመንግሥት ላይ ጉዳት አድርሰዋል የተባለው በሜቴክ ሥር ለሚገኘው የአዳማ እርሻ መሣሪያዎች ኢንጂነሪንግ ኢንዱስትሪ አገልግሎት የሚውሉ ትራክተሮች ግዥ ወቅት፣ ከኮርፖሬሽኑ የግዥ አፈጻጸም መመርያ ውጭና ያለጨረታ ግዢ እንዲፈጸም በማድረጋቸው መሆኑን ዓቃቤ ሕግ በክሱ በዝርዝር ገልጿል፡፡