Skip to main content
x
አሜሪካ በደኅንነት ዘርፍ ዕገዛ እንድታደርግ በመንግሥት የቀረበላትን ጥያቄ መቀበሏን አስታወቀች

አሜሪካ በደኅንነት ዘርፍ ዕገዛ እንድታደርግ በመንግሥት የቀረበላትን ጥያቄ መቀበሏን አስታወቀች

የኢትዮጵያ መንግሥት የደኅንነት ዘርፉ ላይ እያደረገው ባለው ሪፎርም አሜሪካ ዕገዛ እንድታደርግለት መጠየቁንና አሜሪካም ለዚህ ፈቃደኛ መሆኗን፣ የአሜሪካ ኮንግረስ አባልና በውጭ ጉዳይ ኮሚቴ የአፍሪካ ጉዳዮች ንዑስ ኮሚቴ ሰብሳቢ ካረን ባስ አስታወቁ፡፡

በኢትዮጵያና በኤርትራ የሦስት ቀናት የሥራ ጉብኝት ያደረጉት ካረን ባስ የኢትዮጵያና የኤርትራ የሰላም ስምምነትን በማፅደቅ የኢትዮጵያን ሪፎርም እንደሚደግፉ፣ ለዚህም ከኢትዮጵያ መንግሥት የድጋፍ ጥያቄ በዝርዝር እንደቀረበላቸው፣ ሰኞ የካቲት 25 ቀን 2011 ዓ.ም. ለጋዜጠኞች በሰጡት መግለጫ ተናግረዋል፡፡ እነዚህ ድጋፎች የደኅንነት ዘርፉን ሪፎርም በማድረግ ላይ ላለው የኢትዮጵያ መንግሥት፣ የቴክኒክ ድጋፍ ማድረግ እንደሚያካትትም የኮንግረስ አባሏ ጠቁመዋል፡፡

ምንም እንኳን ይህ ድጋፍ በምን እንደሚገለጽ በዝርዝር ባያስረዱም፣ ከእሳቸው ጋር መግለጫ የሰጡት በኢትዮጵያ የአሜሪካ አምባሳደር ማይክል ሬይነር ከሪፖርተር ለተሰነዘረ ጥያቄ በሰጡት ምላሽ ከሁሉም የደኅንነት ዘርፉ ተቋማት የድጋፍ ጥያቄ እንደደረሳቸው አስረድተዋል፡፡

ድጋፎቹ የተቋማቱ መሪዎች ውጤታማና ሙያዊ ብቃት ያላቸው እንዲሆኑ ማስቻል፣ የኢትዮጵያን ፍላጎት የሚያንፀባርቁ እንደሆኑ መረዳት፣ ሕግና ሥርዓትን በማስጠበቅ ረገድ ሚዛናዊ መሆንና የሰዎችን መብቶች የሚያከብሩ እንዲሆኑ ማገዝ ናቸው ሲሉም አክለዋል፡፡

‹‹ከተለመደው የልማትና የሰብዓዊ ዕርዳታ ድግፍ በዘለለ ሰፊ ዕገዛ ለማድረግ ዝግጁ ነን፡፡ የመንግሥትን ዴሞክራሲን የማስፋት ጥረት፣ የምርጫ ሒደት፣ የሲቪክ ማኅበራት ድጋፍና ጠንካራ የግል ሚዲያ እንዲኖር ለማስቻል ድጋፍ የምናደርግባቸውን አማራጮች እያየን ነው፤›› ሲሉ አምባሳደር ሬይነር ገልጸዋል፡፡

የኮንግረስ አባል ባስ በተጨማሪም በኤርትራ ያደረጉት ጉብኝት የመጨረሻው እንደማይሆን ገልጸው፣ ከኢትዮጵያ ጋር የተደረገው የሰላም ስምምነትም ይበል የሚያሰኝ ነው ብለዋል፡፡ ኢትዮጵያም በተለያዩ ዘርፎች የቴክኒክ ድጋፎችን እንደምትሻ ለአሜሪካ ጥያቄ ማቅረቧንም ተናግረዋል፡፡ ‹‹ተግባራዊ እንዲሆኑ ለማድረግ እንሠራለን፤›› ብለዋል፡፡

ከዚህ በተጨማሪም የአሜሪካ የንግድ ድርጅቶች በኢትዮጵያ የሚኖራቸው ተሳትፎ እንዲያድግ እንደሚጥሩ፣ በተፈጠረው የአመራር ለውጥና ሪፎርም ወደ አገሩ እየተመለሰ ያለው ኢትዮጵያዊ ዳያስፖራ ለዚህ ጉልህ ሚና ይኖረዋል ብለው እንደሚያምኑም ገልጸዋል፡፡