Skip to main content
x
መኢአድ አዲስ ሊቀመንበር መረጠ
አዲሱ የመኢአድ ሊቀመንበር አቶ ማሙሸት አማረ

መኢአድ አዲስ ሊቀመንበር መረጠ

መጋቢት 28 እና 29 ቀን 2011 ዓ.ም. ከመላው አገሪቱ የመጡ 459 የጠቅላላ ጉባዔ አባላት በተገኙበት ጠቅላላ ጉባዔውን ያካሄደው የመላው ኢትዮጵያ አንድነት ድርጅት (መኢአድ)፣ አቶ ማሙሸት አማረን ሊቀመንበር አድርጎ መምረጡን አስታወቀ፡፡

ፓርቲው ይህን ያስታወቀው ሐሙስ ሚያዝያ 3 ቀን 2011 ዓ.ም. ቴዎድሮስ አደባባይ አካባቢ በሚገኘው ዋና ጽሕፈት ቤቱ፣ የምርጫውን ውጤትና አጠቃላይ ፖለቲካዊ ጉዳዮችን አስመልክቶ በሰጠው ጋዜጣዊ መግለጫ ወቅት ነው፡፡

ጠቅላላ ጉባዔው ከሊቀመንበር በተጨማሪም አቶ አብርሃም ጌቱን ተቀዳሚ ምክትል ሊቀመንበር አድርጎ የመረጠ ሲሆን፣ አቶ ሙሉጌታ አበበ ደግሞ በነበሩበት ምክትል ሊቀመንበርነት እንዲቀጥሉ መመረጣቸውን አስታውቋል፡፡

አቶ ማሙሸት አማረ በመኢአድ ውስጥ በተፈጠረ አለመግባባት ለዓመታት ተገልለው የቆዩ ሲሆን፣ መጋቢት 10 ቀን 2011 ዓ.ም. በተደረገ ስምምነት ወደ ፓርቲው ዳግም መመለሳቸውን መዘገባችን ይታወሳል፡፡

በቀጣይ ምን ሊሠሩ እንዳሰቡ የተጠየቁት ተመራጩ ሊቀመንበር አቶ ማሙሸት፣ ‹‹ጠቅላላ ጉባዔውን ለመታደም ከተለያዩ የአገሪቱ ክፍሎች የመጡ እንግዶችን ስንሸኝ የሰነበትን በመሆኑ፣ አሁን ይህንን አደርጋለሁ የሚል ዝርዝር ነገር ማቅረብ ይቸግረኛል፡፡ ነገር ግን በቅርብ ቀን ቀጣይ የፓርቲውን ስትራቴጂ አሳውቃለሁ፤›› ሲሉ ለሪፖርተር ምላሽ ሰጥተዋል፡፡

ተሰናባቹ ሊቀመንበር በዛብህ ደምሴን (ዶ/ር) በተመለከተ፣ ‹‹ምንም እንኳን 206 የተቃውሞ ድምፅ ቢሰጥባቸውም በሥራ አስፈጻሚነት እንዲቀጥሉ አድርገናል፤›› ሲሉ አቶ ማሙሸት ገልጸዋል፡፡

ከዚህ በተጨማሪም መኢአድ በተቃዋሚነት ከሚንቀሳቀሱ የፖለቲካ ፓርቲዎችና ሌሎች ለሕዝብ እንሠራለን ከሚሉ ሁሉ ጋር አብሮ በትብብር፣ በጥምረትና በውህደት ለመሥራት ጥሪ አስተላልፏል፡፡