Skip to main content
x
ምድር ባቡር ኮርፖሬሽን የአዲስ አበባ ቀላል ባቡርን ሙሉ ለሙሉ ተረክቦ  ማስተዳደር ሊጀምር ነው
የምድር ባቡር ኮርፖሬሽን ኃላፊዎች ለቋሚ ኮሚቴ አባላት ማብራሪያ ሲሰጡ

ምድር ባቡር ኮርፖሬሽን የአዲስ አበባ ቀላል ባቡርን ሙሉ ለሙሉ ተረክቦ ማስተዳደር ሊጀምር ነው

  • በስድስት ወራት ውስጥ ከ165 ሚሊዮን ዶላር በላይ የብድር ዕዳ መክፈሉ ተገልጿል
  • በሙከራ ጊዜ 15 ግመሎች በባቡር ተገጭተዋል ተብሏል

የኢትዮጵያ ምድር ባቡር ኮርፖሬሽን ከሚቀጥለው ሳምንት ጀምሮ የአዲስ አበባ ቀላል ባቡርን ላለፉት ሁለት ዓመታት ሲያስተዳድረው ከነበረው የቻይና ኩባንያ ተረክቦ፣ በራሱ ማስተዳደር ሊጀምር መሆኑን አስታወቀ፡፡

የኮርፖሬሽኑ ኃላፊዎች ዓርብ ጥር 4 ቀን 2010 ዓ.ም. የስድስት ወራት አፈጻጸም ሪፖርት፣ ለሕዝብ ተወካዮች ምክር ቤት የመንግሥት የልማት ድርጅቶች ጉዳዮች ቋሚ ኮሚቴ ባቀረቡበት ወቅት፣ ቀላል ባቡሩን አስተዳደር ከሦስት ወራት በፊት ለመረከብ ታቅዶ የነበረ ቢሆንም፣ ግንባታውን ያካሄደው የቻይናው ሲአርኢሲ ኩባንያ ቀሪ ሥራዎችን ማጠናቀቅ ስለነበረበት ርክክቡ መዘግየቱን ገልጸዋል፡፡

ነገር ግን ከአንድ ሳምንት በኋላ ርክክቡን ለማድረግ በመንግሥት በመወሰኑ፣ ቀላል ባቡሩን ከገነባው ኩባንያ ለመረከብ መዘጋጀታቸውንና የዲዛይን ሰነዶችን እንደሚረከቡ ዋና ሥራ አስፈጻሚው ብርሃኑ በሻህ (ዶ/ር) ለቋሚ ኮሚቴው ገልጸዋል፡፡

በተያያዘም መንግሥት በቅርቡ ሥራ ለጀመረው የኢትዮ ጂቡቲና ለአዋሽ ወልድያ/ሃራ ገበያ የባቡር ፕሮጀክቶች የተበደረውን ብድር መክፈል የጀመረ መሆኑን፣ ኃላፊዎቹ በሪፖርታቸው አስረድተዋል፡፡

ባለፉት ስድስት ወራት ብቻ ለአዲስ ጂቡቲ የባቡር መስመር ግንባታ ከተበደረው ዕዳ ውስጥ 76.3 ሚሊዮን ዶላር፣ እንዲሁም ለአዋሽ - ወልዲያ/ሃራ ገበያ 89 ሚሊዮን ዶላር ጨምሮ በድምሩ 165.3 ሚሊዮን ዶላር የዕዳ ክፍያ መፈጸሙን አስረድተዋል፡፡ ለዕዳ ክፍያ የዋለው ገንዘብ በቦርዱ አማካይነት ከተለያዩ የመንግሥት ተቋማት የተሰበሰበ መሆኑም ዋና ሥራ አስፈጻሚው ገልጸዋል፡፡

ለዕዳው ክፍያ ከፍተኛ አስተዋጽኦ ያደረጉት በቀዳሚነት ኢትዮ ቴሌኮምና የኢትዮጵያ ንግድ ባንክ መሆናቸው ተጠቅሷል፡፡

ከኢትዮ ቴሌኮም በስድስት ወራት ውስጥ ይገኛል ከተባለው 4.2 ቢሊዮን ብር ውስጥ ሙሉ ለሙሉ ተገኝቶ ለዕዳው ክፍያ መፈጸሙን ኃላፊዎቹ ገልጸዋል፡፡ በአንፃሩም ከኢትዮጵያ ንግድ ባንክ ይገኛል ተብሎ ከሚጠበቀው አሥር ቢሊዮን ብር ውስጥ ግን፣ ኮርፖሬሽኑ መቀበል የቻለው አራት ቢሊዮን ብር ብቻ መሆኑ ጠቁመዋል፡፡ በዚህ ላይ ዝርዝር ማብራሪያ ከመስጠት ተቆጥበዋል፡፡ ለዕዳ ክፍያ በመንግሥት በኩል የሚደረገው ዕገዛ ከፍተኛ መሆኑን ያወሱት ኃላፊዎቹ ዕንቅፋት ሆነውብናል ካሏቸው ችግሮች ውስጥ ደግሞ የውጭ ምንዛሪ እጥረት ዋነኛው መሆኑን አስታውሰዋል፡፡

በአሁኑ ወቅት ኮርፖሬሽኑ ከ170 ቢሊዮን ብር በላይ ካፒታል እንደሚያንቀሳቅስ ሲገለጽ፣ ለግንባታዎች በቢሊዮን ዶላር የሚቆጠር የብድር ዕዳ መክፈል ይጠበቅበታል፡፡  

በቅርቡ ሥራ የጀመረው የአዲስ ጂቡቲ የባቡር ትራንስፖርት ወደ ሥራ መግባቱ ኮርፖሬሽኑ ያለበትን የውጭ ዕዳ ለመክፈል ዕፎይታ እንደሚፈጠርለት ተገልጿል፡፡ የአዲስ ጂቡቲ ምድር ባቡር አገልግሎት ከሁለት ሳምንት በፊት ከአዲስ አበባ የትራንስፖርት አገልግሎት ይጀምራል ተብሎ መበሰሩ ይታወሳል፡፡ ነገር ግን ሪፖርተር ማረጋገጥ እንደቻለው፣ አገልግሎቱ በተግባር የተጀመረው ባለፈው ሳምንት ማክሰኞ ጥር 1 ቀን 2010 ዓ.ም. ነው፡፡

ይህም ሆኖ ወደ ጂቡቲ የሚደረገው ጉዞ ከወዲሁ የትራፊክ ችግር እንደገጠመውም ተወስቷል፡፡ ለአብነትም መደበኛ አገልግሎቱ በዚህ ሳምንት ከመጀመሩ በፊት በሙከራ አገልግሎት ብቻ 15 ግመሎች መገጨታቸውን ዋና ሥራ አስፈጻሚው ለቋሚ ኮሚቴ አባላት ገልጸዋል፡፡

ለተገጩ ግመሎችም ኮርፖሬሽኑ በነፍስ ወከፍ እስከ 30,000 ብር ካሳ ለአርብቶ አደሮች ለመክፈል መገደዱንም ዋና ሥራ አስፈጻሚው አክለዋል፡፡