Skip to main content
x

ክቡር ሚኒስትሩ ከደላላ ወዳጃቸው ጋር ተገናኝተው እያወሩ ነው

አላስተዋልከውም እንጂ በዓመት አንዴ የሚከበረው በዓል በየሳምንቱ እየተከበረ ነው፡፡ የምን በዓል ነው? የብሔር ብሔረሰቦች በዓል ነዋ፡፡ አልገባኝም ክቡር ሚኒስትር? በአንዱ ሳምንት የሰሜን ሸዋ በርኖስ ይለበሳል፣ ሌላው ሳምንት የራያ ባህላዊ ልብስ ይለበሳል፡፡ ልክ ነዎት ክቡር ሚኒስትር፡፡ ሌላው ደግሞ የአክሱም ጽዮን የጵጵስና ልብስ ሲለብስ፣ ሌላው ደግሞ የአባ ገዳን ልብስ ይለብሳል፡፡ ጥሩ ያስተውላሉ ክቡር ሚኒስትር፡፡ አየህ በፊት እነዚህ ልብሶችን የሚያስተዋውቁት ሞዴሎች ነበሩ፣ አሁን ግን ፖለቲከኞቻችን ጥሩ ሞዴሎች ሆነውልናል፡፡ ሐሳብዎት እኮ ሁሌ ያስገርመኛል፡፡    ስለዚህ አሁን ቢዝነሱ የአልባሳት ነው፡፡ እሱማ ጋርመንት ላይ አተኮሮ የሚሠራ ኢንዱስትሪያል ፓርክ አለን አይደል እንዴ? ስለዚህ ቀጣዩ አዋጭ የቢዝነስ ዘርፍ እሱ ነው፡፡ ታዲያ ምን እያሉኝ ነው? ከአንድ አንድ የምንገባበት ቢዝነስ እሱ ነው፡፡ ምን? ሽመና!

ክቡር ሚኒስትሩ ከአንድ አክቲቪስት ነኝ ባይ ጋር ተገናኝተው እያወሩ ነው

- ክቡር ሚኒስትር በዚህ ወቅት ከእርስዎ የምንፈልገው ድጋፍ እንዲያደርጉልኝ ብቻ ነው፡፡ - የምን ድጋፍ? - ለአክቲቪዝም ሥራዬ መጠነኛ የገንዘብ ድጋፍ እንዲያደርጉልኝ ነዋ፡፡ - እኔ ደመወዜ አነስተኛ ስለሆነ ልደግፍህ አልችልም፡፡ - አዲሱ ስታይል እየተጠቀሙብኝ ነው? - ለማንኛውም ይኼ አካሄድህ ስለማያዋጣ ብትተወው ይሻልሃል፡፡ - በፍፁም አልተወውም፡፡ - ያለበለዚያማ መቀላቀልህ አይቀርም፡፡ - ከማን ጋር ነው የምቀላቀለው? - ከገቡት ጋር!

የክቡር ሚኒስትሩን ቢሮ ደላላው በርግዶት ገባ

ክቡር ሚኒስትር የእስሩን ሁኔታማ ሰማነው እኮ፡፡ እንዴት? እስር ቤት በዚህ አፍንጫዬ ውስጥ እስኪርቢቶ ሲከተትበት አስበውታል? በአንተ አፍንጫ ውስጥማ አጠና ነው የሚከቱብህ፡፡ እሱን አይደል እንዴ የምልዎት? በቃ ዝም ብለህ አትፍራ፡፡ እኔ ከዱር እንስሳት ጋር መታሰር አልፈልግም፡፡ ታይላንድ ከነብር ጎን ተነሳሁ ብለህ ፎቶ አሳይተኸኝ አልነበር? ክቡር ሚኒስትር ቀልዱን ይተውት፡፡ መታሰርን እንደዚህ አትፍራ፡፡ ክቡር ሚኒስትር ከታሰርንማ አብረን ነው፡፡ ምን? ለማንኛውም አሁን ሰዎች ደውለው ነግረውኛል፡፡ ምን ብለው? ተቆርጦልናል፡፡ ምን? የእስር ማዘዣ!

ክቡር ሚኒስትሩ ለአንድ ዲፕሎማት ስልክ ይደውላሉ

እንደምታውቀው እኛ እንደ አገር የመካከለኛ ገቢ ካላቸው አገሮች ተርታ ለመሠለፍ እየሠራን ነው፡፡ እሱንማ አውቃለሁ፡፡ ሰውዬው ከአገራችን በፊት በግሉ ከእነሱ አገሮች ተርታ መሠለፍ ችሏል፡፡ እ. . . እሱ ብቻ ሳይሆን ብዙዎችን ከድህነት ወለል በታች አንስቶ እሱ የደረሰበት ደረጃ አድርሷል፡፡ ምን ይቀልዳሉ? ብቻ ምን አለፋህ አገሪቱ 11 በመቶ እንድታድግ ከፍተኛ ሚና ሲጫወት የነበረው እሱ ነው፡፡ እና ምን እያሉ ነው? እኛም እናንተ ጋ የመደብነው እናንተም ከእኛ ተምራችሁ እንደ እኛ የምታድጉበትን መንገድ ያሳያችኋል ብለን ነው፡፡ አሁን አረጋገጡልኝ ክቡር ሚኒስትር፡፡ ምኑን? የወሰነው ውሳኔ ትክክል መሆኑን፡፡ ምን ነካህ ወዳጄ ከእሱ እኮ ብዙ ትማራላችሁ እያልኩህ ነው? ከእሱ የምንማረው አንድ ነገር ብቻ ነው፡፡ ምንድነው? ሌብነት!

ክቡር ሚኒስትሩ ከሌላ ሚኒስትር ጋር በስልክ እያወሩ ነው

- ክቡር ሚኒስትር ምንድነው የምሰማው? - ምን ሰማህ? - ተው እንጂ ክቡር ሚኒስትር ከቁጥጥር ውጪ እየሆኑ እኮ ነው? - ምንድነው የምታወራው? - የእርስዎ ግን በዛ፣ እኔ ራሴ ማፈር ጀመርኩ፡፡ - ምኑ ነው ያሳፈረህ? - በየቦታው የሌብነትና የሙስና ችግር ካለ የእርስዎ ስም እኮ ነው የሚነሳው፡፡ - ስማ ሪፎርሙን የማይቀበሉ አካላትን ወሬ ዝም ብለህ ማስተጋባት የለብህም፡፡ - እንዴት? - ከማንም በፊት መደመሬን ታውቃለህ? - እሱማ ልክ ነው፡፡ - አየህ በፊት እነሱ ሲሰርቁ ዝም በማለቴ አሁን ያጋልጠናል ብለው ስለሚፈሩ ነው እንደዚህ ስሜን የሚያጠፉት፡፡ - አልመሰለኝም ክቡር ሚኒስትር፡፡ - ለመሆኑ ምን ሰምተህ ነው? - ከተማ ውስጥ ስም አልባ ከሆኑት ሕንፃዎች መካከል ሁለቱ የእርስዎ ናቸው ይባላል፡፡ - ለእዚህ ነው እኮ እያሳሳቱህ ነው ያልኩህ? - እንዴት ክቡር ሚኒስትር? - እኔ ከእነሱ ውስጥ አራት ነው ያሉኝ፡፡ - ይኼን ነበር የፈራሁት፡፡ - ምን ነካህ አገሪቱ በ11 በመቶ እያደገች እኛ ካላደግን ምን ትርጉም አለው? - ለማንኛውም አካሄድዎ ትክክል አይመስለኝም ክቡር ሚኒስትር፡፡ - አካሄዴማ ትክክል ለመሆኑ አትጠራጠር፡፡ - ብቻ የእኔ ፀሎት አንድ ነው፡፡ - ምንድነው? - አወዳደቅዎትን. . . - እ. . . - ያሳምርልዎት!

ክቡር ሚኒስትሩ ከአንድ ዳያስፖራ ጋር እያወሩ ነው

ባለፉት ዓመታት አገሪቱ 11 በመቶ አድጋለች ምናምን የምትሉት ምንም ትርጉም እንደሌለው ተረድቻለሁ፡፡ በአንዴ እንደዚህ አትማረር፡፡ ክቡር ሚኒስትር አገሪቱ አድጋለች ምናምን የምትሉትን ቀልድ ብትተውት ያወጣችኋል፡፡ ምን እያልክ ነው? በቅርቡ የጤና ጥበቃ ሚኒስቴር 27 በመቶ ሕዝብ የአዕምሮ ጤና ችግር እንዳለበት ይፋ አድርጓል፡፡ ምንድነው የምታወራው? ስለዚህ ላለፉት 27 ዓመታት ሕዝቡን ስታሳድጉት አልነበረም፡፡ ታዲያ ምን ስናደርገው ነበር? ስታሳብዱት!

ክቡር ሚኒስትሩ ከሌላ ሚኒስትር ጋር እያወሩ ነው

ይህ የፈንጠዝያ ሚኒስቴር ዋናው ሥራው በየሳምንቱ ቅዳሜ ሕዝቡ በየሥጋ ቤቱ እስኪጠግብ በልቶ የተከሸነውን እንዲጋት ያደርጋል፡፡ ኖት እየያዝኩ ነው ክቡር ሚኒስትር፡፡ ወደ አመሻሽ ላይ ደግሞ በየፓርኮቹ አሉ የተባሉ ዲጄዎች በሙዚቃ ድግስ ሌሊቱን ሙሉ ሕዝቡን ያስፈነድቁታል፡፡

ሠራተኛው ክቡር ሚኒስትሩ ቢሮ ገባ

ክቡር ሚኒስትር ይኼው መደመር ምናምን ብለው እኔን በጎን ቀነሱኝ፡፡ አታልቅስ በቃ፡፡ ይኼን ሁሉ ዓመት የለፋሁበት መና እኮ ነው የቀረው፡፡ እንዴ ከዚህ ከተባረርክ ሌላ ቦታ መቀጠር ትችላለህ እኮ? እንዳይመስልዎት ክቡር ሚኒስትር፣ እኔን ማንም አይቀጥረኝም፡፡ ለምን አትቀጠርም? ምክንያቱም የእኔ ሙያ እዚህ መሥሪያ ቤት ብቻ ነው የሚያገለግለው፡፡ ትምህርት ተምረሃል አይደል እንዴ? እሱማ ተምሬያለሁ፡፡ ከተማርክ ታዲያ እንዴት ሌላ ቦታ መቀጠር ያቅትሃል? ክቡር ሚኒስትር ትምህርቴ ለዚህ መሥሪያ ቤት ብቻ ነው የሚያገለግለው፡፡ ዲግሪ አለኝ ብለኸኛል አይደል እንዴ? እሱማ አለኝ ክቡር ሚኒስትር፡፡ ለመሆኑ ዲግሪህን በምንድነው የሠራኸው? በአብዮታዊ ዴሞክራሲ!

ክቡር ሚኒስትር ከአንድ የምርጫ ቦርድ ኃላፊ ጋር ምሳ እየበሉ ነው

አዲስ የፖለቲካ ፓርቲ ላቋቁም እያሰብኩ ነው፡፡ የምን ፓርቲ ነው? አገሪቱ እኮ በቋፍ ላይ ነው ያለችው፡፡ እሱስ እውነትዎትን ነው፡፡ ስለዚህ እንደኛ ዓይነቱ በሳል አመራር ፖለቲካውን ሊመራው ይገባል፡፡ ምን ዓይነት ፍልስፍና ያለው ፓርቲ ሊያቋቁሙ ነው? አብዮታዊ ዴሞክራሲ የሚያራምድ ነዋ፡፡ ክቡር ሚኒስትር ፓርቲዎች ሁሉ ከዚህ ፍልስፍና እየወጡ ዴሞክራሲ እናራምዳለን በማለት ስያሜያቸውን እየቀሩ እኮ ነው፡፡ እኛም ስያሜያችን ውስጥ ዴሞክራሲ የሚለውን ቃል መጠቀም እንችላለን፡፡ ለመሆኑ የፓርቲው ስያሜ ምንድነው የሚለው? ቀ.ሥ.ና.ዴ.ፓ! ምን ማት ነው? የቀድሞ ሥርዓት ናፋቂ ዴሞክራሲያዊ ፓርቲ!