Skip to main content
x
ጉጉት

ጉጉት

ጉጉት ስትጮህ የምትቸኩል፣ የሌሊት አሞራ ድመት መሳይ፤ ሌሊት ቀኑ፣ ቀን ሌሊቱ፤ በጩኸቷ ጐትት የምትል፤ ሲል ይፈታታል የአለቃ ደስታ ተክለ ወልድ ዐዲስ ያማርኛ መዝገበ ቃላት (1962 ዓ.ም.)፡፡ በጩኸቷ ጐትት ጐትት የምትል በመሆኑ ባላገሮች ‹‹ሰው ይሞታል›› ይላሉ፡፡

ናሽናል ጂኦግራፊ በድረ ገጹ እንዳሠፈረው፣ ከጉጉቶች ሁሉ እንደበረዶ የነጡት ነጭ ጉጉቶች በአርክቲክ፣ ዛፍ በሌለበት ተንድራ አካባቢ ብቻ ይኖራሉ፡፡ ከሴቶቹ ይልቅ ወንዶቹ እንደበረዶ የነጡ መሆናቸውን ሴቶቹ እንደበረዶ በነጣው ላባቸው ላይ ቡናማ ወይም ጥቁር ነጠብጣብ አላቸው፡፡

በአብዛኛው የሚመገቡት ትናንሽ የአይጥ ዝርያዎችን ሲሆን፣ ወፎችና ዓሳዎችም ከምግቦቻቸው ይመደባሉ፡፡ ጉጉቶች የማየት ችሎታቸው የሚደነቅ ነው፡፡ ሆኖም ለምግብነት የሚያድኗቸው እንስሳት ቅጠል ላይ ቢለጠፉ፣ ከዓይናቸው ይልቅ ጆሯቸውን በመጠቀም እንስሳቱን ይይዛሉ፡፡ አብዛኞቹ የጉጉት ዓይነቶች ቀን በመተኛት ሌሊት ላይ ምግባቸውን የሚያድኑ ቢሆንም፣ ነጩ ጉጉት በተቃራኒው ንቁ የሚሆነው ቀን ላይ ነው፡፡

ነጭ ጉጉት እስከ ሕይወት ፍጻሜው ከአንዲት ጉጉት ጋር ብቻ ተወስኖ ይኖራል፡፡ ሴቷ ጉጉት በአንድ ጊዜ ከሦስት እስከ 11 እንቁላሎች ትጥላለች፡፡ ብዙ ምግብ ባለበት ወቅት ደግሞ ቁጥሩ ከ11 ይበልጣል፡፡

ሴቷ ጉጉት እንቁላል ታቅፋ ለመፈልፈል አንድ ወር ይፈጅባታል፡፡ በዚህ ወቅት የሚመግባት ወንዱ ጓደኛዋ ነው፡፡ ጫጩቶቹ ከተፈለፈሉ በኋላ በ45 ቀናት ውስጥ መብረር የሚችሉ ቢሆንም፣ እስከ አሥር ወር ድረስ እናትና አባታቸው ክትትል ያደርጉላቸዋል፡፡