Skip to main content
x
የዘርፍ ምክር ቤቶች ውጭ ሄደው በቀሩ አመራሮች ምትክ አዲስ ኃላፊዎችን ሰየሙ

የዘርፍ ምክር ቤቶች ውጭ ሄደው በቀሩ አመራሮች ምትክ አዲስ ኃላፊዎችን ሰየሙ

የኢትዮጵያ የዘርፍ ማኅበራት ምክር ቤት ከአገር ወጥተው በዚያው በቀሩት ፕሬዚዳንቱ ምትክ ጊዜያዊ ፕሬዚዳንት ሰየመ፡፡

የኦሮሚያና የአማራ የዘርፍ ማኅበራት ምክር ቤቶችም እንደወጡ በቀሩት ኃላፊዎች ምትክ ነባሮቹን ምክትል ፕሬዚዳንቶች በተጠባባቂ ፕሬዚዳንትነት እንዲሠሩ መመደባቸው ታውቋል፡

ከዘርፍ ምክር ቤቱ የተገኘው መረጃ እንደሚያስረዳው፣ ጊዜያዊ ፕሬዚዳንት ሆነው በምክር ቤቱ ቦርድ አባላት የተሰየሙት የሶማሌ ዘርፍ ማኅበራት ምክር ቤት ፕሬዚዳንትና የኢትዮጵያ ዘርፍ ምክር ቤት ቦርድ አባል ሐሰን አብዱላሂ (ዶ/ር) ናቸው፡፡

ሳያሳውቁ አውስትራሊያ ገብተው በዚያው ቀርተዋል በተባሉት የቀድሞው የምክር ቤቱ  ፕሬዚዳንት አቶ ኢያሱ ሞሲሳ እንዲሁም ምክትላቸው አቶ ልሳኑ በለጠ እንዲታገዱ መወሰኑንም ምክር ቤቱ አስታውቋል፡፡ በሁለቱ የምክር ቤቱ አመራሮች ላይ የተደረገ ዕገዳ  በዘርፍ ምክር ቤቱ መተዳደሪያ ደንብ መሠረት እንደተከናወነም ተጠቅሷል፡፡

በመተዳደሪያ ደንቡ መሠረት አንድ የቦርድ አባል በሦስት ተከታታይ የቦርድ ስብሰባዎች ላይ ካልተገኘ ይታገዳል በሚለው ድንጋጌ መሠረት ዕርምጃው እንደተወሰደ የታወቀ ሲሆን፣ አዲሱ ተጠባባቂ ፕሬዚዳንት የተመረጡትም ከዚሁ ውሳኔ በኋላ ነው ተብሏል፡፡ የኢትዮጵያ ዘርፍ ማኅበራት ምክር ቤት ቀሪዎቹ የቦርድ አባላት አውስትራሊያ ሄደው ቀርተዋል በተባሉት ፕሬዚዳንቱና ምክትል ፕሬዚዳንቱ ላይ የዕግድ ዕርምጃ ከመውሰዱ በፊት፣ ምክር ቤቱ በግለሰቦቹ ኢሜይል አድራሻ ማብራሪያ እንዲሰጡና በሥራ ገበታቸው ላይ ያልተገኙበትን ምክንያት እንዲገልጹ ጥሪ አድርጎ ነበር፡፡ በተሰጣቸው የጊዜ ገደብ ውስጥ ምላሽ ሳይሰጡ መቅረታቸውም የምክር ቤቱ ቦርድ የዕግድ ዕርምጃውን ለመውሰድ እንደተገደደ ጠቅሷል፡፡ በኮበለሉት ፕሬዚዳንት ምትክ በጊዜያዊነት ኃላፊነቱን የተረከቡት አዲሱ ተጠባባቂ ፕሬዚዳንት፣ በቦታቸው የሚቆዩት እስከመጪው ጠቅላላ ጉባዔ እንደሆነም ተጠቁሟል፡፡ የምክትል ፕሬዚዳንቱ ቦታ ግን እስከሚቀጥለው ጠቅላላ ጉባዔ ድረስ ክፍት ሆኖ እንደሚቆይ የምክር ቤቱ መረጃ ያስረዳል፡፡

በሌላ በኩል የቀድሞዎቹ አመራሮች የተመረጡት በምክር ቤቱ ጠቅላላ ጉባዔ አማካይነት በመሆኑ ሊሽራቸው የሚችለውም ይኸው ጠቅላላ ጉባዔ እንደሆነና፣ ጉዳዩ መጪውን መደበኛ  ጉባዔ ጠብቆ ይካሄድ ወይስ አስቸኳይ ጉባዔ ይጠራ የሚለው ጥያቄ ምላሽ አላገኘም፡፡ ሆኖም የምክር ቤቱ ዕለታዊ ተግባር እንዳይታጎል ተጠባባቂ ፕሬዚዳንት እንደተመደበለት ታውቋል፡፡ ከኢትዮጵያ የንግድ ልዑካን ጋር ወደ አውስትራሊያ በማቅናት በዚያው የቀሩት አቶ ኢያሱ፣ የኦሮሚያ የዘርፍ ማኅበራት ምክር ቤት ፕሬዚዳንት ሆነው ይሠሩ ስለነበር፣ ይህ የኃላፊነት ቦታቸውም በአዲስ አመራር እንዲተካ ተደርጓል፡፡

ከኦሮሚያ የዘርፍ ምክር ቤት በተገኘው መረጃ መሠረት፣ ወደፊት ጠቅላላ ጉባዔ እስኪካሄድ ድረስ በኦሮሚያ የዘርፍ ምክር ቤት መተዳደሪያ መሠረት ‹ፕሬዚዳንቱ በሌሉበት ወቅት ምክትላቸው የፕሬዚዳንቱን ቦታ ተክቶ ይሠራል፤› ስለሚል፣ ከአገር ወጥተው የቀሩት የአቶ ኢያሱ ምክትል አቶ አበበ በንቲ የኦሮሚያ የዘርፍ ምክር ቤት ፕሬዚዳንት ሆነው  ተሰይመዋል፡፡ በአቶ ኢያሱን ከአገር መውጣት ምክንያት የቦርድ አባላቱ ባካሄዱት ስብሰባ ይህንኑ ውሳኔ ማስተላለፋቸው ታውቋል፡፡

አውስትራሊያ ተጉዘው ሳይመለሱ በቆዩት የቀድሞው የአማራ ክልል የዘርፍ ምክር ቤት ፕሬዚዳንትና የኢትዮጵያ የዘርፍ ምክር ቤት ምክትል ፕሬዚዳንት አቶ ልሳኑ በለጠ ምትክ አዲስ ተመራጭ ባይሰይምም፣ የአማራ ዘርፍ ማኅበራት ምክር ቤት ምክትል አቶ ደስታው ዘመነ የፕሬዚዳንቱን ቦታ ተክተው እንዲሠሩ ተደርጓል፡፡

አቶ አበባው የፕሬዚዳንቱን ቦታ ተክተው እንዲሠሩ የተወሰነውም ፕሬዚዳንቱ በሌሉበት ምክትሉ ኃላፊነቱን ተክቶ ይሠራል በሚለው መተዳደሪያ ደንብ መሠረት እንደሆነ ከዘርፍ ምክር ቤቱ የተገኘው መረጃ ያስረዳል፡፡

በሌላ መረጃ አቶ ኢያሱ በክልልና በአገር አቀፍ የዘርፍ ማኅበራት ምክር ቤት ውስጥ ከነበራቸው ኃላፊነት በተጨማሪ፣ የኢትዮጵያ ንግድና የዘርፍ ማኅበራት ምክር ቤት የቦርድ አባል ስለነበሩ በዚህ ቦርድ ውስጥ የነበራቸው ኃላፊነትም መነሳቱ እየተገለጸ ነው፡፡

አቶ ኢያሱ ከአገር ወጥተው የቀሩት በመንግሥት ባለሥልጣናት በተመራው የንግድ ልዑካን ቡድን ውስጥ ተካተው በመጓዝ አውስትራሊያ ከገቡ በኋላ ነው፡፡ አቶ ልሳኑ በዚሁ የንግድ ልዑካን ቡድን ውስጥ ለተሳተፉ ተጓዦች በተሰጠው ቪዛ ወደ አውስትራሊያ በመግባት በዚያው የቀሩት፣ የጉዞ ፕሮግራሙ ከተጠናቀቀ በኋላ በድጋሚ በግላቸው ተጉዘው እንደሆነ መዘገቡ አይዘነጋም፡፡