Skip to main content
x

የወልዲያ ግጭት ወደሌሎች ከተሞች እየተዛመተ ነው

በሰሜን ወሎ ዞን ወልዲያ ከተማ ተነስቶ ለሳምንት የዘለቀው ግጭት ወደሌሎች አካባቢዎች መዛመቱን በስፍራው ያሉ የሪፖርተር ባልደረቦች ተመልክተዋል፡፡

በጥር 12 ቀን 2010 ዓ.ም. የቃና ዘገሊላ በዓል አከባበር ላይ የተወሰኑ ተሳታፊዎች ፖለቲካዊ ይዘት ያላቸውን ዘፈኖች ዘፍነዋል በሚል ከፀጥታ አካላት ጋር በተፈጠረ ግጭት ወደ ቆቦና መርሳ ከተሞች መዛመቱ ከሁለት ቀናት በፊት ሲነገር ነበር፡፡ ዛሬ ጥር 20 ቀን 2010 ዓ.ም. ግጭቱ ከወልዲያ ጥቂት ኪሎ ሜትሮች ርቀት ላይ ወደምትገኘው ሲሪንቃ ከተማ መዛመቱን ሪፖርተር መታዘብ ችሏል፡፡

በአካባቢው መኪኖች እየተቃጠሉ ሲሆን፣ መንገዶችም በድንጋይና በቁርጥራጭ እንጨቶች ተዘግተዋል፡፡ ከመሐል ሜዳ ወደ መርሳ የሚወስደው መንገድ እንደተዘጋና ምንም ዓይነት የትራንስፖርት አገልግሎትና የንግድ እንቅስቃሴዎች እንደማይታዩ ለመታዘብ ተችሏል፡፡ ይህም ትናንት የመርሳ ከተማ አስተዳዳሪን ጨምሮ የበርካታ ሰዎች ሕይወት ያለፈበትን ግጭት ተከትሎ በስፋት እየተስተዋለ ነው፡፡

በመርሳ ከተማ ፍርድ ቤቶች፣ ሆቴሎችና ሱቆች እንደተቃጠሉና ለቁጥር የሚያዳግቱ የንግድ ቤቶችና የመንግሥት መሥሪያ ቤቶች መቃጠላቸው ታይቷል፡፡

በስፍራው በተለይ የመከላከያና የፌዴራል ፖሊስ አባላት የሚታዩ ሲሆን፣ ከወልዲያ ወደ መረሳ የሚሄዱ የሕዝብና የጭነት ትራንስፖርቶች በአጀብ እየተንቀሳቀሱ ነው፡፡