Skip to main content
x
የኢትዮጵያ መንገዶች ባለሥልጣን 153.9 ሚሊዮን ብር እንዳይከፈለው ክስ ቀረበበት

የኢትዮጵያ መንገዶች ባለሥልጣን 153.9 ሚሊዮን ብር እንዳይከፈለው ክስ ቀረበበት

የኢትዮጵያ መንገዶች ባለሥልጣን በኦሮሚያ ክልል የጌዶ-ፊንጫ-ለምለም በረሃ መንገድ ፕሮጀክት የጌዶ መናቤኛ መንገድ ሥራ ለማሠራት፣ ሀውክ ኢንተርናሽናል የፋይናንስና ኮንስትራክሽን ኃላፊነቱ የተወሰነ የግል ማኅበር ጋር በነበረው የሥራ ውል ምክንያት በፌዴራል ከፍተኛ ፍርድ ቤት ክስ ቀረበበት፡፡

ባለሥልጣኑን የከሰሰው ሀውክ ኢንተርናሽናል ፋይናንስና ኮንስትራክሽን ኃላፊነቱ የተወሰነ የግል ማኅበር በክሱ እንዳብራራው፣ ለመልካም ሥራ አፈጻጸም ዋስትና ንብ ባንክ 153,957,947 ብር አስይዟል፡፡ ማኅበሩ ከባለሥልጣኑ ጋር በገባው ውል መሠረት ሥራውን እየሠራ መሆኑን፣ በውሉ መሠረት ላከናወናቸው ሥራዎች ተፈጻሚ የሚሆኑ ክፍያዎች እንዲፈጸምለት በአማካሪ መሐንዲሱ የፀደቁ የክፍያ ምስክር ወረቀቶች ለኢትዮጵያ መንገዶች ባለሥልጣን ያቀረበ ቢሆንም፣ ባለሥልጣኑ ክፍያውን ለመፈጸም ፈቃደኛ አለመሆኑን አስረድቷል፡፡ ከ12 ጊዜያት በላይ ደብዳቤዎችን በመጻፍ ለስምንት ወራት ያህል ቢጠይቅም ክፍያው ሊፈጸምለት እንዳልቻለም አክሏል፡፡

ሕጉን ተከትሎ ኮንትራክተሩ የማስጠንቀቂያ ደብዳቤ የሰጠ ቢሆንም፣ ባለሥልጣኑ እንኳን ክፍያ ሊፈጽምለት ለደብዳቤዎቹም ምላሽ ሊሰጠው እንዳልቻለ በክሱ ላይ ገልጿል፡፡

የኢትዮጵያ መንገዶች ባለሥልጣን ለተከታታይ ስምንት ወራት ክፍያ እንዲፈጽምለት ሲጠይቀው ምላሽ ሊሰጠው ባለመቻሉ፣ ኮንትራክተሩ የመጨረሻና ውሉን ሊያቋርጥ መገደዱን የሚገልጽ ደብዳቤ እንደጻፈለት አስታውቋል፡፡ ኮንትራክተሩ ውል እንደሚያቋርጥ የመጨረሻ ደብዳቤ የደረሰው ባለሥልጣኑ ክፍያውን እንደሚከፍል ገልጾ የውል ስረዛ ደብዳቤውን እንዲያነሳለት እንደጠየቀው በክሱ አብራርቷል፡፡ ነገር ግን ኮንትራክተሩ የክፍያውን ቀን ቆርጦ በሒሳብ ቁጥሩ ገቢ እንዲያደርግለት የማስጠንቀቂያ ደብዳቤ እንደሰጠው ጠቁሟል፡፡

የኢትዮጵያ መንገዶች ባለሥልጣን ከኮንትራክተሩ የተሰጠውን ማስጠንቀቂያ ወደ ጎን በመተው፣ በጎን በኩል ዋስትና የሰጠውን ንብ ኢንተርናሽናል ባንክ ለመልካም ሥራ አፈጻጸም የተያዘውን ገንዘብ በሒሳብ ቁጥሩ ገቢ እንዲያደርግለት በደብዳቤ መጠየቁን ገልጿል፡፡ ባለሥልጣኑ ባንኩ ገንዘቡን እንዲያስገባለት የጠየቀው፣ ኮንትራክተሩና ዋስትና የሰጠው ጁሊየስ ባየር የተባለ የውጭ ባንክ በውሉ መሠረት ሥራው እንዳልተሠራ ገልጾ ማስጠንቀቂያ ቢሰጥም፣ በውሉ መሠረት ግዴታዎቹን ሊወጣ አለመቻሉን ገልጾ መሆኑን በክሱ አብራርቷል፡፡

ባለሥልጣኑ ግን ለባንኩ የጻፈው ደብዳቤ ሐሰተኛ ቃል ከመሆኑም በተጨማሪ፣ ራሱን ያላግባብ ለማበልፀግና በኮንትራክተሩ ላይ ጉዳት ለማድረስ አስቦ የተጠቀመበት ከሕግና ከሞራል ውጪ የሆነ አካሄድ መሆኑን አስታውቋል፡፡ ለስምንት ወራት የጠየቀባቸውን ደብዳቤዎች ከክሱ ጋር አያይዞ ማቅረቡም እውነትነቱን አመላካች መሆኑን አክሏል፡፡ ውሎች አስገዳጅነታቸው በውሉ ላይ በተነገሩት ጉዳይ ወይም ድንጋጌዎች ብቻ ሳይሆን ቅን ልቦና፣ ፍትሕ፣ ልማድና የውለታው ዓይነት በሚያስከትሏቸው ነገሮችም ጭምር መሆኑን ክሱ ያብራራል፡፡ የውል መርሆዎች የውል ግዴታዎች በመሆናቸው በተዋዋይ ወገኖች ከተሰጡ የውል ግዴታ መጣስን የሚያረጋግጡ መሆናቸውንም አስረድቷል፡፡ ውሉ የመልካም አፈጻጸም ዋስትና በመሆኑ፣ ባለሥልጣኑ የዋስትና ልዩ ተጠቃሚ ከመሆኑ አንፃር ከፍተኛ እምነት የሚጠይቅ ውል መሆኑን አስረድቷል፡፡

ባለሥልጣኑ የቅን ልቦና ግዴታ በመጣስ ኮንትራክተሩ በውሉ መሠረት ሳይከፈለው ለረዥም ጊዜ መሥራቱና ውል አለመጣሱን እያወቀ፣ ፍጹም ሐሰት የሆነ ምክንያት በማቅረብ ለንብ ባንክ የክፈለኝ ጥያቄ ማቅረቡ ተገቢ አለመሆኑን በክሱ አስረድቷል፡፡ በመሆኑም ባለሥልጣኑ ግዴታውን ሳይፈጽም ሌላው ግዴታውን እንዲፈጽም እያደረገ ያለው አካሄድ ትክክልና ሕግን ያልተከተለ በመሆኑ፣ ኮንትራክተሩ ውሉን በሕግ አግባብ ከሰረዘ ባለሥልጣኑ የዋስትና ሰነዱን ተፈጻሚ ሊያደርግ የሚችልበት የሕግ አግባብ እንደሌለ አስታውቆ፣ የተጠየቀው የዋስትና ገንዘብ ‹‹ሊከፈል አይገባም›› ተብሎ እንዲወሰንለት ፍርድ ቤቱን ጠይቋል፡፡