Skip to main content
x
ለክቡር ሚኒስትሩ አንድ ተቃዋሚ ከውጭ ደወለላቸው

ለክቡር ሚኒስትሩ አንድ ተቃዋሚ ከውጭ ደወለላቸው

[የክቡር ሚኒስትሩ ሾፌር ከቤት ወደ ቢሮ እየወሰዳቸው ነው]

  • ደህና አደሩ ክቡር ሚኒስትር?
  • ሰላም አደርክ?
  • ሥራ እንዴት ነው ክቡር ሚኒስትር?
  • ምነው ጠየቅኸኝ?
  • ያው አገሪቷ ውጥረት ውስጥ ስለሆነች ሥራ ይበዛብዎታል ብዬ ነው፡፡
  • እሱማ ሕዝብ ትልቅ ኃላፊነት ነው የጣለብን፡፡
  • ግን የተጣለባችሁን ኃላፊነት እየተወጣችሁ ነው ወይ?
  • ይኸው ቀን አንል ሌሊት ወጥረን እየሠራን ነው፡፡
  • ታዲያ ቀን ከሌት እየሠራችሁ ነው አገሪቷ እንደዚህ ዓይነት ችግር ውስጥ የገባችው?
  • ምን ነካህ ከፍተኛ የሕዝብ ኃላፊነት እኮ ነው የተሸከምነው?
  • እኔ ግን ሕዝቡ እናንተን የተሸከማችሁ ነው የሚመስለኝ፡፡
  • ምን አልክ አንተ?
  • ክቡር ሚኒስትር ሕዝቡ መጮህ ከጀመረ ሰነባበተ እኮ?
  • ሕዝቡ ለምን ይጮሃል?
  • እናንተ ናችኋ የምታስጮሁት፡፡
  • እኛ ምን አድርገን ነው የምናስጮኸው?
  • በመልካም አስተዳደር ችግሩ ቢሉ በፍትሕ ችግሩ ኧረ ምኑ ቅጡ?
  • እሺ የእኛ አክቲቪስት?
  • ክቡር ሚኒስትር እኔ አክቲቪስት ሆኜ ሳልሆን እውነታውን ነው የነገርኩዎት፡፡
  • የምን እውነታ ነው?
  • ይኸው ሕዝቡን ማዳመጥ ትታችሁ ራሳችሁን ማዳመጥ ከጀመራችሁ ሰነባበታችሁ፡፡
  • ምንድነው የሚያወራው ይኼ?
  • አሁንማ ይባስ ብላችሁ ሕዝቡን ከፋፍላችሁ ኢትዮጵያዊነትን እያጠፋችሁት ነው፡፡
  • እንዴት ነው ኢትዮጵያዊነት የጠፋው?
  • ይኸው እንደ አገር አንድ የሚያደርጉንን በዓላት ማክበር ትተን ትልቅ ትኩረት የሚሰጣቸው የፓርቲ በዓላት ናቸው፡፡
  • ምን ችግር አለው?
  • ለነገሩ በትምህርቱ ብዙ ባልገፋበትም ከፋፍለህ ግዛ የሚል ታክቲክ መኖሩ ትዝ ይለኛል፡፡
  • አልገባኝም?
  • ያው እናንተ በሥልጣን ለመቆየት ሕዝቡን መከፋፈል አለባችኋ፡፡
  • ለምን የማታውቀን ነገር ትዘባርቃለህ?
  • ክቡር ሚኒስትር የአንድ የፖለቲካ ፓርቲ የምሥረታ በዓል ነው ወይስ እንደ ዓደዋ ያለ አገራዊ በዓል በድምቀት መከበር ያለበት?
  • በነገራችን ላይ የአንተ ሥራ እኔን ከቦታ ቦታ ማዘዋወር መስሎኝ ነበር፡፡
  • እሱማ ልክ ነው፡፡
  • አየህ አሁን ግን ሁሉም የፖለቲካ ተንታኝ፣ ሁሉም ያለ እኔ አዋቂ የለም ባይ እየሆነ ነው፡፡
  • እኔ የፖለቲካ ተንታኝም ወይም አዋቂ ሆኜ ሳይሆን እንደ ዜጋ የሚሰማኝን ነው የነገርኩዎት፡፡
  • ስማ በማያገባህ ነገር ብዙ ባትገባ ጥሩ ነው፡፡
  • እንዴት አያገባኝም ክቡር ሚኒስትር?
  • አንተ አርፈህ ሥራህን ሥራ፡፡
  • እናንተም አርፋችሁ ሥራችሁን ሥሩ፡፡
  • እንዴት ነው የተናናቅነው?
  • እውነት ሲነገረዎት ለምን ይበሳጫሉ ክቡር ሚኒስትር?
  • ስማ እዚህ ቦታ ላይ የተቀመጥኩት የማንን ጥቅም ለማስጠበቅ እንደሆነ ታውቃለህ?
  • የሕዝቡን ጥቅም ለማስጠበቅ ነዋ፡፡
  • ማን ነው ያለው?
  • ለነገሩ የማንን ጥቅም እንደሚያስጠብቁ ይታወቃል፡፡
  • የማንን ጥቅም ነው የማስጠብቀው?
  • የራስዎትን!

[ለክቡር ሚኒስትሩ አንድ ተቃዋሚ ከውጭ ደወለላቸው]

  • ክቡር ሚኒስትር እንዴት ነዎት?
  • ምን ፈልገህ ደወልክ?
  • አሁን ወሳኝ ነጥብ ላይ ደርሰናል፡፡
  • እንዴት ማለት?
  • ይኸው እኛም እየተዘጋጀን ነው፡፡
  • ምን ለማድረግ?
  • አገሪቷ እኮ ወሳኝ ምዕራፍ ላይ ናት ያለችው፡፡
  • ምን ይጠበስ?
  • ይህችን አገር እንደ አገር ለማስቀጠል የእኛ ሚና ወሳኝ ነው፡፡
  • አትቀልድ እባክህ?
  • ክቡር ሚኒስትር ይኸው ከሩብ ምዕተ ዓመታት በላይ ቀልዳችሁ እዚህ ደርሳችኋል፡፡
  • ወኔህን አደንቅልሃለሁ፡፡
  • ይህ የወኔ ጉዳይ ሳይሆን የአገር ጉዳይ ነው፡፡
  • ለማንኛውም ምኞት አይከለከልም፡፡
  • ክቡር ሚኒስትር ለዚህች አገር ተስፋዋ እኛ ነን፡፡
  • አታስቀኝ እባክህ?
  • ክቡር ሚኒስትር እኔ ይኸው ከዛሬ ነገ ትኬት ለመቁረጥ ተዘጋጅቼ ነው ያለሁት፡፡
  • ምን ለመሆን ነው የምትመጣው?
  • የአገሪቷን የፖለቲካ ቀውስ ለመፍታት የእኛ ሚና ወሳኝ ነው፡፡
  • ማን ናችሁ እናንተ?
  • በውጭ ያለን ተቃዋሚዎች ነን፡፡
  • ዶሮ ብታልም ጥሬዋን አሉ፡፡
  • ምን እያሉ ነው ክቡር ሚኒስትር?
  • እናንተ ከመቼ ጀምሮ ነው ስለኢትዮጵያ የሚቆረቁራችሁ?
  • ለዚህች አገር ከእኛ በላይ የታገለ አለ እንዴ?
  • እሱን እንኳን ተወው፡፡
  • እንዴት ማለት?
  • አሁን ያው ትራምፕ ራሱ አልመች እንዳላችሁ እናውቃለን፡፡
  • በእርግጥ እሱ ለማንም አይመችም፡፡ ግን ይኼ ከእሱ ጋር ምንም አይገናኝም፡፡
  • ወይስ  የታክሲ ገበያው ተቀዛቀዘ?
  • ክቡር ሚኒስትር ለአገሪቷ በጣም እናስፈልጋለን ስልዎት?
  • የእኔ ምክር ምን እንደሆነ ታውቃለህ?
  • ምንድነው?
  • አርፈህ ኡበርህን አጧጡፍ፡፡
  • ክቡር ሚኒስትር እኛ ከእናንተ በላይ ስለአገሪቷ እናስባለን፡፡
  • ለዚያ ነው አሜሪካ ታክሲ የምትነዳው?
  • አሁን ክፉ መነጋገር አያስፈልግም፡፡
  • ታዲያ አንተ ራስህ ለምን ክፉ ታናግረኛለህ?
  • እኔ የደወልኩት አንድ ነገር ለመጠየቅ ነው፡፡
  • ምን ልትጠይቀኝ?
  • ቀኑ ተቆርጧል ወይ ለማለት ነዋ?
  • የምኑ ቀን?
  • የድርድር ነዋ፡፡
  • ማን ከማን ጋር ነው የሚደራደረው?
  • እኛ ከእናንተ ጋር ነዋ፡፡
  • ሰውዬ በጣም ኮሜዲያን ሆነሃል፡፡
  • ይኼ ቀልድ አይደለም እኮ አልኩዎት፡፡
  • ስማ እኛ እዚህ ካሉት ጋር እንደራደራለን፡፡
  • እኛስ?
  • እናንተም እዚያው ተደራደሩ፡፡
  • ከማን ጋር?
  • እርስ በርሳችሁ!

[ክቡር ሚኒስትሩ ከልጃቸው ጋር እያወሩ ነው]

  • አንድ ጥያቄ አለኝ ዳዲ፡፡
  • የምን ጥያቄ?
  • ምን እያደረጋችሁ ነው?
  • ምን ማለት ነው?
  • ትንሽ እንኳን ኃላፊነት አይሰማችሁም?
  • ምንድነው የምታወራው?
  • ሕዝቡን አጣልታችሁ አጣልታችሁ በኋላ ላይ ግፍ አይሆንባችሁም?
  • የምን ግፍ ነው?
  • ይኸው ሕዝቡ በብሔር፣ በጎጥ፣ በመንደር ተከፋፍሎ እየተባላ ነው፡፡
  • እ. . .
  • ወጣቱም እኮ ከእናንተ ጋር ከፍተኛ ልዩነት እንዳለው እያያችሁ ነው፡፡
  • እንዴት ማለት?
  • ወጣቱ የሚፈልገው ሌላ፣ እናንተ የምታቀርቡለት ሌላ፡፡
  • እሺ የእኛ ፖለቲከኛ፡፡
  • ፖለቲከኛ ሆኜ ሳይሆን እውነቱን ነው የነገርኩህ ዳዲ፡፡
  • አንተን ደግሞ ማን ነው የላከብኝ?
  • ዳዲ ሕዝቡ ለሚጠይቀው ጥያቄ ትክክለኛውን ምላሽ ስጡ፡፡
  • አሁን አንተ ምኑን አውቀኸው ነው?
  • እንዴ ይኸው ሕዝቡ አስተካክሉ እያለ እየጠየቃችሁ እኮ ነው?
  • ምንድነው የምናስተካክለው?
  • ሕዝብን በጉልበት መግዛት አይቻልም፡፡
  • ምን?
  • አሁን የእኛን ቤት ጥበቃ በፍቅር ነው እንጂ ማስተዳደር ያለብን በጉልበት ማሠራት አንችልም፡፡
  • ታዲያ እኛ መቼ በጉልበት አሠራነው?
  • አየህ ሕዝቡን አሁን በጉልበት ማስተዳደር አይቻልም፡፡
  • ወይ ጣጣ?
  • እንደነገርከኝ ድሮ እናንተ በወጣትነት ጊዜያችሁ የራሳችሁ ጥያቄ ነበራችሁ፡፡
  • እሱ እኮ ነው ለዚህ ያበቃን፡፡
  • አየህ ልህ እንደዚያ የአሁኑ ወጣቶችም የራሳቸው ጥያቄ አላቸው፡፡
  • ወጣትነት እኮ ከባድ ነው፡፡
  • አይ ዳዲ የአሁኑ ወጣቶችም የራሳችን ጥያቄ አለን፡፡
  • ጥያቄያችሁ ምንድነው?
  • ጥያቄያችንማ ከብሔርና ከጎጥ ወጥተን ታላቋን ኢትዮጵያ መገንባት ነው፡፡
  • እ. . .
  • ለዚህም ስትራቴጂ ነድፈን እየተንቀሳቀስን ነው፡፡
  • ምን ዓይነት ስትራቴጂ?
  • ፓርቲ ልናቋቁም ነው፡፡
  • ምን የሚባል ፓርቲ?
  • መአዴግ፡፡
  • ምንድነው መአዴግ?
  • መላው የአራዳ ዴሞክራሲያዊ ግንባር!

[ክቡር ሚኒስትር ከሌላ ሚኒስትር ጋር በቀጣዩ ጠቅላይ ሚኒስትር ዙሪያ እያወሩ ነው]

  • ዛሬ ለምን እንደፈለኩግህ ታውቃለህ?
  • ለምንድን ነበር የፈለጉኝ?
  • የእኛ ፓርቲ የሚያቀርበውን ዕጩ እንድትመርጥልን ነው፡፡
  • እሱን ባደርግ እኔ ምን እጠቀማለሁ?
  • አየህ ከእንዲህ ዓይነቱ ነጋዴ ጋር ነው ማውራት የሚያስደስተኝ፡፡
  • ሰጥቶ መቀበል እኮ ጥርሳችንን የነቀልንበት ነው፡፡
  • ለነገሩ አንተ ከባለሥልጣንነት ባሻገር በንግድ ሥራ ነው የምትታወቀው፡፡
  • ክቡር ሚኒስትር እንደዚያ ባይሆንማ ይኼን ሁሉ ሀብት ባላፈራሁ፡፡
  • አሁን ከአንተ የአንተን ድምፅ ብቻ ሳይሆን የሌሎች ወዳጆችህን ድምፅ እንፈልጋለን፡፡
  • ስለ እሱ አያስቡ፣ ዋናው ለእኛ ምን አለው የሚለው ነው፡፡
  • ምንድነው የምትፈልገው?
  • ክቡር ሚኒስትር እኔ ከተገኘ ውጭ ጉዳይ፣ አይ ከተባለ የንግድ፣ አይ ከተባለም የፋይናንስና ኢኮኖሚክ ትብብሩን ባገኘው ደስ ይለኛል፡፡
  • ለምን?
  • እኔ ያው የቢዝነስ ሰው ስለሆንኩ ከኢንቨስተሮችና ከገንዘብ አካባቢ መራቅ አልፈልግም፡፡
  • እነዚህን ብቻ ነው የምትፈልገው?
  • በተጨማሪም አንድ ሦስት የሚሆኑ የልማት ድርጅቶች ቦርድ ውስጥ መግባት እፈልጋለሁ፡፡
  • አሁን እዚህ መነጋገር ያለብን ነገር አለ፡፡
  • ምን ክቡር ሚኒስትር?
  • ለአንድ ድምፅ የጠየቅከው ነገር ብዙ ነው፡፡
  • እንዴት ማለት?
  • ውጭ ጉዳይ አራት ድምፅ ይፈልጋል፣ ስለዚህ ሦስት ተጨማሪ ሰዎች ያስፈልጉሃል፡፡
  • እሺ፡፡
  • ንግድ በሁለት ድምፅ ይሆናል፡፡
  • ፋይናንስና ኢኮኖሚክ ትብብሩስ?
  • እሱ ደግሞ ሦስት ድምፅ ይፈልጋል፡፡
  • ለልማት ድርጅት ቦርድ አባልነትስ?
  • እሱን ለአንድ ድርጅት በአንድ ድምፅ መደራደር እንችላለን፡፡
  • ክቡር ሚኒስትር በዚህ ከተስማማን ሁሉን ነገር ለእኔ ይተውት፡፡
  • ሰዎች አሉኝ እያልክ ነው?
  • በአንድ የስልክ ጥሪ መጨረስ እችላለሁ ስልዎት?
  • እርግጠኛ ነህ?
  • የእኔን ብቃት አያውቁትም ማለት ነው?
  • የእኛን ዕጩ ማስምረጥ ትችላለህ?
  • ክቡር ሚኒስትር ብቻ የምጠይቀው ሁሉ ይፈጸምልኝ፡፡
  • ይኼን ካስፈጸምክ ከሚኒስትርነቱ ባሻገር የአምስት ድርጅቶች ቦርድ አባል ትሆናለህ፡፡
  • እንዲህ ካደረጉልኝማ ዕጩውን አይደለም ለኢትዮጵያ ጠቅላይ ሚኒስትርነት ለሌላም ላስመርጥ እችላለሁ፡፡
  • ለሌላ ለማን?
  • ለእንግሊዝ!